Секој втор четврток во март се одбележува Светскиот ден на бубрегот во повеќе од 200 држави ширум светот
♦♦♦♦♦♦♦
Бубрежните болести не се толку ретки како што се мисли – дури едно од девет лица во светот има бубрежна болест. Во 2019 година, по 5 лица секоја недела ги губеле своите животи додека чекале трансплантација на бубрег. Просечното време на чекање за трансплантација на бубрег е 3 години. Околу 25% од луѓето кои поради болеста Ковид-19 биле на механичка вентилација развиле акутна бубрежна инсуфициенција и имале потреба од дијализа.
Во земјава околу 200 илјади граѓани имаат некоја форма на бубрежно заболување, а на дијализа одат 1.600 пациенти во 23-те центри низ државата
Дијализата е најчесто застапениот метод во земјава за третирање на крајниот стадиум на бубрежната болест кога двата бубрега повеќе не можат да ја извршуваат функцијата.
Пациентите поминуваат од 4 до 5 часа за да им се прочисти крвта од сите отрови и вишок вода во организмот. Во земјава околу 200 илјади граѓани имаат некоја форма на бубрежно заболување, а на дијализа одат 1.600 пациенти во 23-те центри низ државата.
„Квалитетот на живеење кај пациентите со хронична бубрежна болест варира и во зависност од нивниот карактер, опкружувањето, семејната атмофера, третманот кој го добива како и од другите придружни болести. Прифаќањето на новиот начин на живот со сите ограничувања кои ги носи е тешко и секој различно го доживува. На пациентите со бубрежни болести им се потребни повеќе видови на поддршка како од медицинскиот персонал, така и од семејството и општеството воопшто за да можат да го надминат прифаќањето на болеста и да продолжат да живеат со неа“, велат од Здружението на бубрежно болни граѓани „Нефрон“, кое годинава, поради пандемијата, ги откажа сите традиционални настани и се фокусира на едукација и поддршка на годинашната кампања „Живеј квалитетно со бубрежната болест“.
Најголем дел од луѓето немаат симптоми се додека хроничната бубрежна болест не се развие во понапреднат стадиум кога се јавуваат: потечени глуждови, замор, тешкотии во концентрацијата, намален апетит, крв во урината и пенеста урина
Оттаму додаваат дека иако најоптимален метод за лекување на бубрежната болест е трансплантацијата на бубрег, сепак во нашата земја овој метод е недоволно применуван.
Осум златни правила за бубрежна превенција
Институтот за јавно здравје на својот веб-сајт објавува 8 златни правила за подобра бубрежна превенција:
- Одржувајте ја кондицијата и активноста;
- Правете редовни контроли на нивото на шеќерот во крвта;
- Контролирајте го крвниот притисок;
- Внесувајте здрава храна и одржувајте ја телесната тежина, редуцирајте го внесот на сол на 5 грама во еден ден (околу едно кафено лажиче);
- Одржувајте здрав внес на течности – секојдневно пиење од 1,5 -2 литри вода;
- Престанете со пушење;
- Не консумирајте постојано лекови без потреба, особено нестероидни и антиинфламаторни лекови;
- Редовно контролирајте ја функцијата на бубрезите.
Дали сте под ризик за болест на бубрезите?
Една од целите на Светскиот ден на бубрегот е да се упати повик на сите луѓе да проверат дали се под ризик за болест на бубрезите. За да проверат, треба да одговорат на следните прашања и ако одговорот е „ДА“ барем на едно од поставените прашања, треба да разговараат со својот доктор и доколку треба да направат иследувања за болести на бубрезите.
- Дали имате покачен крвен притисок?
- Дали страдате од шеќерна болест?
- Дали имате фамилијарна историја за болести на бубрегот?
- Дали имате прекумерна телесна тежина?
- Дали пушите?
- Дали имате над 50 години?
Луѓето што се под ризик за развој на болест на бубрези, треба да се поттикнат да направат едноставни испитувања за проценка на функционирањето на бубрезите. Се прават едноставни лабораториски тестови на мала количина крв (за мерење количина на креатинини и да се процени стапката на гломеруларна филтрација) и на мала количина на урина (за мерење на излачувањето на креатинин и албумин).
- ПРОЧИТАЈТЕ И… Интервју со проф. д-р Велибор Тасиќ: Уринарната инфекција е прв сигнал за оштетување на бубрезите
Најголем дел од луѓето немаат симптоми се додека хроничната бубрежна болест не се развие во понапреднат стадиум кога се јавуваат: потечени глуждови, замор, тешкотии во концентрацијата, намален апетит, крв во урината и пенеста урина, пишува на веб-сајтот на ИЈЗ.
