ПИШУВА:
Катерина Шекеровска-Димовска
katerina@pedijatar.mk
Во преполна сала, со обраќања на видни гости и присуство на бројни лекари, предавачи и специјалисти од различни области, како и претставници на фармацевтските компании, вчеравечер свечено беше отворен 27. Симпозиум со меѓународно учество на Здружението на лекари по општа и семејна медицина (ЗЛОМ-СМ). Симпозиумот се одржува од 24 до 26 април 2026 година во хотелот „DoubleTree by Hilton“ во Скопје и е тематски насловен „Четири системи – една индивидуа“.
Семејните лекари се столбот врз кој се потпира целиот здравствен систем и најчесто првиот, но и најважниот сојузник на пациентот во грижата за здравјето. Тие не се само лекари кои реагираат кога ќе се појави проблем, туку професионалци кои континуирано ја следат здравствената состојба, препознаваат ризици и делуваат превентивно. Благодарение на нивното познавање на пациентот и неговата историја, навреме откриваат и спречуваат состојби како дијабетес тип 2, хипертензија, кардиоваскуларни заболувања и др. Истовремено, семејните лекари се клучни координатори во здравствениот систем, насочувајќи ги пациентите кон соодветни специјалисти и следејќи го текот на лекувањето.
Темата на овој симпозиум „Четири системи – една индивидуа“ е длабоко суштинска и современа. Таа нè потсетува дека ниту еден орган, ниту еден систем не постои изолирано. Кардиоваскуларниот систем, пулмолошкиот, ендокринолошкиот, нервниот и имунолошкиот систем се во постојана суптилна интеракција, создавајќи комплексна мрежа која го дефинира здравјето и болеста. Нашата задача како лекари по семејна медицина е да ја разбереме таа поврзаност, да ги препознаеме раните сигнали и да понудиме еден холистички, интегриран пристап кон пациентот
Нивниот пристап е сеопфатен, бидејќи го гледаат пациентот како целина. Токму холистичкиот пристап кон пациентот е во фокусот на 27. Симпозиум на ЗЛОМ-СМ, кој ако се суди по почетокот – ќе ги надмине досегашните изданија.
„Овој настан не е само континуитет, туку е една успешна традиција, еден успешен доказ за зрелоста, посветеноста и визијата на нашата струка. Во време кога медицината се развива со огромна брзина, кога знаењето се фрагментира на сè потесни специјалности, ние како лекари од примарната здравствена заштита имаме привилегија, но и обврска да ја зачуваме целината на човекот како центар на медицинската грижа. Токму темата на овој симпозиум „Четири системи – една индивидуа“ е длабоко суштинска и современа. Таа нè потсетува дека ниту еден орган, ниту еден систем не постои изолирано. Кардиоваскуларниот систем, пулмолошкиот, ендокринолошкиот, нервниот и имунолошкиот систем се во постојана суптилна интеракција, создавајќи комплексна мрежа која го дефинира здравјето и болеста. Нашата задача како лекари по семејна медицина е да ја разбереме таа поврзаност, да ги препознаеме раните сигнали и да понудиме еден холистички, интегриран пристап кон пациентот“, истакна д-р сци. Драган Ѓорѓиевски, претседател на ЗЛОМ-СМ и потпретседател на Европската унија на семејни лекари (UEMO), во своето поздравно обраќање до присутните.
Тој додаде дека семејната медицина не е само дисциплина – таа е филозофија на работа, континуитет, доверба, превенција и долгорочна грижа за пациентот. „Таа значи да се познава пациентот не само по дијагнозата туку и по неговиот животен контекст, семејството, навиките и предизвиците со кои се соочува.
Стручната програма на 27. Симпозиум на ЗЛОМ-СМ опфаќа широк и внимателно избалансиран спектар на актуелни и клинички релевантни теми од секојдневната медицинска практика, насочени кон унапредување на дијагностиката, третманот и континуираната грижа за пациентите
Токму затоа денеска сакам да ја нагласам нашата заедничка заложба – борбата за вистинско, суштинско признавање на семејната медицина како столб на здравствениот систем во нашата земја“, додаде д-р сци. Ѓорѓиевски.
На свеченото отворање на симпозиумот пред присутните се обратија и Беким Сали, вицепремиер на Владата на РСМ, Сашо Клековски, директор на Фондот за здравствено осигурување на Република Северна Македонија, проф. д-р Калина Гривчева-Старделова, претседател на Лекарската комора на Република Северна Македонија (ЛКРСМ), проф. д-р Горан Димитров, претседател на Македонското лекарско друштво (МЛД) и првиот човек на Европската унија на семејни лекари (UEMO) д-р Тијаго Вилануева, кој имаше свое видеообраќање.
Доделени плакети, признанија и благодарници
Здружението на лекари по општа и семејна медицина (ЗЛОМ-СМ), во рамките на свеченото отворање на симпозиумот, им додели плакети, признанија и благодарници на истакнати членови, како и на институции со кои негува долгогодишна и успешна соработка.
Со плакети на 27. Симпозиум на ЗЛОМ-СМ беа одликувани: д-р Љубин Шукриев, д-р Димитар Алексов, д-р Миодраг Миленковиќ, д-р Параскева Костовска, д-р Ленче Јанева и д-р Славица Китаноска – како признание за нивниот значаен придонес во развојот на општата и семејната медицина.
По официјалниот дел, симпозиумот продолжи во пријатна и опуштена атмосфера, проследен со коктел, музика во живо и неформални разговори, што овозможи дополнително зближување и размена на искуства меѓу присутните.
Обемна, динамична и содржински богата програма
Стручната програма на 27. Симпозиум на ЗЛОМ-СМ опфаќа широк и внимателно избалансиран спектар на актуелни и клинички релевантни теми од секојдневната медицинска практика, насочени кон унапредување на дијагностиката, третманот и континуираната грижа за пациентите.
Посебно место имаат и ретките болести, каде што вниманието е насочено кон дијагностичките предизвици и улогата на матичниот лекар во нивното рано препознавање и насочување
Во фокусот се состојби со висока застапеност во примарната здравствена заштита, како аритмиите и хипертензијата, со посебен акцент на нивна рана детекција и соодветен менаџмент, но и заболувања како гастроезофагеалната рефлуксна болест и хроничните хепатити, кои бараат навремено препознавање, следење и правилно упатување.
Во рамките на симпозиумот се дискутира и за невролошките состојби – од епилепсија и мигрена до мозочен удар – со фокус на рана дијагноза и интервенција, како и респираторни заболувања како хронична опструктивна белодробна болест и астма, при што се нагласува значењето на точната дијагностика, третманот и долгорочното следење.
27. Симпозиум со меѓународно учество на ЗЛОМ-СМ трае до недела (26 април) и ќе заврши со доделување сертификати и традиционална групна фотографија на учесниците
Посебно место имаат и ретките болести, каде што вниманието е насочено кон дијагностичките предизвици и улогата на матичниот лекар во нивното рано препознавање и насочување. Дополнително, преку слободните теми се отвора простор за презентација на нови научни сознанија, клинички искуства и реални примери од практиката, што ја прави програмата динамична, практично ориентирана и директно применлива во секојдневната работа.
Преку стручни предавања на водечки домашни и странски експерти од различни медицински области, панел-дискусии и интерактивна размена на искуства, симпозиумот има за цел да придонесе кон унапредување на знаењата и клиничките вештини на здравствените работници, да поттикне мултидисциплинарна соработка и да ја зајакне улогата на општата и семејната медицина како темел на современиот здравствен систем, со фокус на квалитетна, координирана и пациент-центрирана здравствена грижа.
27. Симпозиум со меѓународно учество на ЗЛОМ-СМ трае до недела (26 април) и ќе заврши со доделување сертификати и традиционална групна фотографија на учесниците.
