Кога детето многу се поти тоа значи дека има одлична терморегулација. Потењето е механизам со кој организмот се ослободува од прекумерната топлина. Дете кое обилно се поти, потешко ќе се прегрее и ќе добие, на пример, топлотен удар на жешко време, во споредба со она кое помалку се поти.
- Ако детето се поти додека спие, прво проверете да не е претопло во просторијата. Температурата за спиење треба да биде 16-20 степени Целзиусови, најдобро околу 18 степени.
- Дали детето е премногу облечено или покриено?
- Дали станува збор за дебело дете? Тие повеќе се потат.
Доколку ниту една од горе наведените ситуации не е присутна, тогаш проверете дали детето има зголемена температура, и дали има уште некои симптоми кои би укажувале на некои банални болести кои се чести во детството.
Иако обилното потење е честа појава кај сосема здраво дете, кај некои деца ретко, но сепак може да постои сериозна причина за тоа, како што е туберкулоза, пореметување на функцијата на штитната жлезда или малигнитет.
Значи, ако имате дете кое од раѓање и со текот на годините повеќе се поти, а расте и се развива нормално, и нема изглед на болно дете – веројатно е во прашање здраво дете.
Ако потењето е нов симптом кој се појавил кај детето, а тоа не изгледа болно, еве во кои случаи е потребно да се јавите кај педијатар:
- Детето изненадно почнува да се поти повеќе од вообичаеното
- Потењето го пореметува дневното функционирање на детето
- Детето има необјасниво ноќно потење
