Нема докази за несакани ефекти, но исто така во моментот нема ни докази за безбедноста на вакцината затоа што бремените жени, како што е вообичаено, биле исклучени од сите испитувања за вакцинација
На бремените жени во Велика Британија нема да им биде понудена вакцината против коронавирус на „Фајзер“ поради недоволните испитувања, велат експертите.
Трудниците нема да бидат ниту меѓу првите што ќе ја добијат оксфордската или вакцината на „Модерна“, доколку бидат одобрени, бидејќи ниту една идна мајка не била вклучена во клиничките испитувања.
Владата на Велика Британија издаде упатства во кои е јасно назначено дека бремените жени не треба да се вакцинираат. Жените кои мислат дека можеби се бремени се повикуваат да ја одложат вакцинацијата се додека не се уверат дека не се бремени, а оние што се обидуваат да добијат бебе исто така не треба да се вакцинираат.
Како и да е, оваа мерка е исклучиво поради претпазливост, а и не е невообичаено одредени групи на луѓе да бидат исклучени од употребата на потполно нови вакцини, пишува „Дејли мејл“.
Вакцината на „Фајзер“ минатата недела беше одобрена од Велика Британија со добра безбедносна оцена и без докази кои укажуваат на тоа дека бремените жени се во опасност. Но, научниците не ја тестирале вакцината кај бремени жени и доилки, така што нема конкретни докази и дека би била безбедна и ефикасна.
Жените кои мислат дека можеби се бремени се повикуваат да ја одложат вакцинацијата се додека не се уверат дека не се бремени, а оние што се обидуваат да имаат бебе исто така не треба да се вакцинираат
Научниците мораат да направат исклучително ригорозно лабораториско тестирање пред да можат да ја испробаат вакцина кај бремените жени, бидејќи се можни последици и несакани ефекти. Адекватно тестирање кај бремените жени не може да се спроведе во кратки временски рамки во кои се развиени вакцините против коронавирус.
Во вторникот беше одлучено вакцината да не се дава и на лица со тешки алергии, откако две лица претрпеа алергиски реакции по вакцинирањето. Д-р Мари Рос Дејви, од Кралскиот колеџ на акушерки (RCMР), изјави: „Во моментов нема доволно докази кои би препорачале вакцинирање на бремени жени против Ковид-19“.
Меѓутоа, Институтот за јавно здравје на Англија потврди дека моментално достапните докази не укажуваат на каква било опасност од вакцината за бременоста.
„Нема докази за несакани ефекти, но исто така во моментот нема ни докази за безбедноста затоа што бремените жени, како што е вообичаено, беа исклучени од сите испитувања за вакцинација“.
