Пишува: Катерина Шекеровска-Димовска
katerina@pedijatar.mk
Вакцината против морбили, заушки и рубеола (МРП) не го зголемува ризикот од појава на аутизам, а не предизвикува ниту аутизам кај деца кои спаѓаат во т.н. ризични групи, покажала обемната студија на данските научници.
Резултатите од новото истражување беа објавени вчера во стручното списание „Annals of Internal Medicine“. Станува збор за една од најголемите студии од ваков тип, во чии рамки истражувачите ги обработувале податоците и медицинската документација на повеќе од 657.000 деца родени во Данска во периодот меѓу 1999 и 2010 година.
Загриженоста околу потенцијалната поврзаност помеѓу МРП вакцината и аутизмот трае повеќе од две децении, „благодарение“ на студијата на Ендру Вејкфилд, специјалист гастроентеролог, објавена во 1998 година во медицинскиот журнал „Д Лансет“. Вејкфилд, голем противник на вакцинирањето, бил финансиран од адвокатска фирма која планирала да ги тужи производителите на МРП вакцини. Докторот во 2010 год. ја изгубил лекарската лиценца. Подоцна журналот ги повлекол информациите за резултатите од студијата, бидејќи истрагата открила дека британскиот лекар ги сменил односно погрешно ги презентирал податоците за дванаесетте деца, кои биле основа за заклучокот на неговата студија.
Иако бројни истражувања потоа не пронајдоа поврзаност помеѓу МРП вакцината и аутизмот, стравот кај родителите растеше за да кулминира со намалување на опфатот на вакцинација во Европа и САД и појава на епидемии на мали сипаници.
Што се однесува до најновата студија, кај вакцинираните деца се забележани 7 отсто помали изгледи за развој на аутизам отколку кај децата кои не биле вакцинирани, објавија истражувачите во „Annals of Internal Medicine“.
Вакцината против морбили, заушки и рубеола (МРП) не го зголемува ризикот од појава на аутизам, а не предизвикува ниту аутизам кај деца кои спаѓаат во т.н. ризични групи, покажала обемната студија на данските научници, во која биле опфатени повеќе од 650.000 деца
„Родителите не би требало да го прескокнуваат вакцинирањето со МРП поради стравот од аутизам“, изјавил водечкиот автор на студијата, д-р Андерс Хвид од „Статенс серум институтот“ во Копенхаген.
Вирусот на морбили е многу заразен и може да биде смртоносен, а во потешки случаи може да се развијат и компликации како пневмонија или енцефалитис, воспаление на мозокот.
На надворешните површини вирусот може да живее до два часа, а луѓето обично се заразуваат со вдишување капки или со допирање на контаминирана површина, а потоа допирање на очите, носот, устата…
Загриженоста околу потенцијалната поврзаност помеѓу МРП вакцината и аутизмот трае повеќе од две децении
Данските истражувачи ја испитувале поврзаноста помеѓу МРП вакцината и аутизмот, следејќи го развојот на децата од првата година од нивниот живот до крајот на август 2013 година. Вкупно 95 проценти од децата кои учествувале во студијата биле вакцинирани. Истражувањето покажало дека кај деца со аутистични браќа и сестри е забележана седум пати поголема шанса за развој на аутизам отколку кај деца без таква семејна историја. Дијагнозата на аутизам била регистрирана четири пати почесто кај момчињата отколку кај девојчињата.
Според податоците на УНИЦЕФ и Светската здравствена организација бројот на случаи на мали сипаници ширум светот пораснал за 48,4 отсто од 2017 до 2018 год.
Светската здравствена организација смета дека и покрај достапноста на вакцини, одбивањето на вакцинирање е една од десетте најголеми закани за глобалното здравје во 2019 година.
Клиничка слика на морбили: Слабост, малаксаност, покачување на телесната температура
Слабост, малаксаност, покачување на телесната температура, воспалителна реакција на рожниците на очите, слузницата на дишните патишта и појава на осип, кој постепено се шири од лицето и вратот кон телото и екстремитетите – вака изгледа клиничката слика на морбилите. „Инкубацијата трае 10-12 дена, кога детето е без никакви симптоми. Последните три до четири дена од инкубацијата детето е заразно за околината. Клиничката слика се одвива во три стадиуми, но посебно се значајни и опасни компликациите како што е воспалението на белите дробови и на мозокот, кои се главни носители на морталитетот од оваа болест“, предупредува д-р сци. Александар Сајковски, специјалист педијатар–неонатолог.
Морбилите најчесто траат околу две недели, но реконвалесценцијата може да трае и неколку недели. Компликациите се многу чести, а се рангираат од умерено тешки како што се дијареја, до многу сериозни како што е пневмонија (како примарна вирусна пневмонија или секундарна бактериска пневмонија), бронхитис, отитис, акутна инфламација на централниот нервен систем во форма на енцефалитис до субакутен склерозирачки паненцефалитис, улцерации на корнеа на окото до слепило. Дополнително самата морбили инфекција врши супресија на имунолошкиот систем во наредните недели и месеци, што контрибуира со суперинфекции како што се бактериски воспаленија на средно уво и бактериски пневмонии.
БЛИЦВЈУ. Што велат македонските педијатри…
Аутизмот дефинитивно не асоцира со МПР вакцината
„Што се однесува до асоцијацијата на вакцината МПР и аутизмот до денешен ден не е публицирана или објавена ниту една релевантна клиничка студија која оваа асоцијација ја потврдува. Јас лично читам по многу портали за разни стравови, „докази“ за улогата на оваа вакцина во појавата на аутизмот, но, мора да напоменам дека ниту една не е објавена, публицирана или потврдена од релевантни институции и индивидуи.
Впрочем, кога се појави сомнението дека во вакцината стабилизаторите кои содржат метали се причина за аутизмот, истите веднаш беа отстранети и денеска истите ги нема во вакцината, а инциденцата на аутизмот и спектарот на аутистични болести е скоро дуплиран. Затоа топло им советувам на сите пред да читаат информации за оваа вакцина да го проверат изворот на информации и да не заборават на неверојатната максима на Максим Горки: „ПАЗЕТЕ КОГА ЧИТАТЕ КНИГИ ЗА МЕДИЦИНА. МОЖЕ ДА УМРЕТЕ ОД ПЕЧАТНА ГРЕШКА“. Притоа, интересен е фактот дека противниците на вакцинациите, но и другите родители им даваат на своите деца да гледаат цртани филмови од мобилни телефони или таблети, односно малку зборуваат за радиофрекфентните зрачења, малку за ирационалното користење на пестициди, хербициди или органофосфати. Инциденцата на аутизмот рапидно се зголемува од година во година и добива епидемиски карактер. Тој асоцира несомнено со технолошкиот развиток на човештвото, а не со вакцинациите. Мојата порака е дека аутизмот дефинитивно не асоцира со оваа вакцина, но би ги замолил сите родители да направат анализа на начинот на нивниот живот, исхрана и влијанието на епигенетиката врз нивното лично здравје и врз здравјето на нивните деца“.
Д-р сци. Александар Сајковски, специјалист педијатар – неонатолог
Иако ја повлекоа, штетата од студијата во 1998 год. веќе беше направена
„Не постои ниту еден научен доказ или студија која ја објаснува поврзаноста на МПР вакцината со аутистичните нарушувања кај децата.
Постои само една првична студија во 1998 год. која го подигна сомневањето дека постои одредена поврзаност на МПР вакцината со аутистичните нарушувања, но кај истата студија се утврдија доста неправилности и сериозни пропусти при нејзиното изготвување при што истата се повлече од списанието. Но, за жал, штетата веќе беше направена. Уште еднаш ќе потенцирам: Не постои релевантен, научен доказ за поврзаноста на МПР вакцината со аутистичните нарушувања кај децата“.
Д-р Македонка Глигорова, педијатар
Ниту една студија не го потврди аутизмот, напротив го отфрли
„Ниту една студија не го потврди аутизмот, напротив го отфрли. Антиваксерите се држат упорно на аутизмот“
- Д-р Мими Кимовска-Христова, специјалист педијатар
Не постои релевантен, научен доказ за поврзаност помеѓу МРП-вакцината и аутистичните нарушувања
„Причините за аутизам сѐ уште не се добро познати. Родителите за прв пат ги препознаваат знаците на аутизам помеѓу 18 и 24-месечна возраст, период кога веќе сите вакцини се примени, поради што ги обвинуваат вакцините. Експертите за невролошки развој можат да препознаат знаци на аутизам на многу помала возраст, пред родителите да можат да ги забележат.
Студијата која во 1998 година го подигна сомнението дека постои одредена поврзаност помеѓу вакцината против мали сипаници, рубеола и заушки (МРП) и аутизмот, подоцна се покажа дека има сериозни пропусти и дека е неверодостојна. Објавениот труд бил повлечен од списанието, но за жал, паниката која ја предизвика беше причина за пад на опфатот со оваа вакцина и за неколку последователни епидемии од овие заболувања. Не постои релевантен, научен доказ за поврзаност помеѓу МПР-вакцината и аутистичните нарушувања“.
Прим. д-р Марина Поп-Лазарова, специјалист педијатар – неонатолог
Не постојат медицински докази за поврзаност на вакцините со аутистичен синдром
„Не постојат медицински докази за поврзаност на вакцините, вклучувајки ја и МРП вакцината со аутистичен синдром. Сите студии во кои се споредени стотици илјади деца кои примиле МРП вакцина со оние кои не примиле, докажале дека инциденцата за појава на аутистично однесување е подеднаква во двете групи“.
- Прим. д-р Петре Крстев, педијатар
