ПИШУВА:
Д-р Славица Тодоровска
педијатар
♦♦♦♦♦♦♦
Н
ајчести причинители на инфекции во овој период се вирусите. Децата се најизложени на инфекции, посебно децата во градинките и училиштата, каде што го поминуваат поголемиот дел од денот. Најчести се горно-респираторните инфекции, а во овој период се застапени и ентеровирозите. Се пренесуваат по директен капков пат и брзо се шират. Се манифестираат во зависност од локализацијата на инфекцијата со течење од носот, покачена температура, кашлица, течни столици, осип и повраќање.
Малите деца се најподложни на инфекции. Најчест причинител на респираторните инфекции е т.н. респираторен синцицијален вирус, а кај ентеровирозите тоа се рота вируси. Најважно за родителите е да знаат дека вирусните инфекции треба да се лекуваат само симптоматски, а не да се даваат антибиотици. Во најголем број на случаи имаат поволен тек при што организмот со своите одбранбени сили успешно ја совладува вирусната инфекција. Битно е, поучени од својот педијатар, да знаат како да му ги олеснат симптомите на своето дете.
Температурата најдобро се намалува преку туширање, капење во млака вода или масажа со медицински алкохол
Симптоматски значи при покачена температура (повеќе од 38,5 Ц) да се дава антипиретик од парацетамолски тип, да се обезбеди доволен внес на течности во облик на сокови, чаеви или специјално приготвени раствори за орална рехидрација. Се препорачува и зголемен внес на витамин Ц преку внес на свежо овошје и зеленчук.
⇓ ПРОЧИТАЈТЕ И…
- Д-р Славица Тодоровска: БЕБЕТО НЕ МОЖЕ ДА СЕ ПРЕЈАДЕ ОД МАЈЧИНО МЛЕКО
- Д-р Славица Тодоровска: Бледило, намален апетит, чести инфекции – симптоми на анемија во детската возраст
Температурата најдобро се намалува преку туширање, капење во млака вода или масажа со медицински алкохол. Притоа треба да се внимава водата во која се тушира т.е. бања детето да биде пријатно темперирана да не дојде до нагло разладување на телото, при што детето може да се шокира. При екстремно високи температури најдобро е телото на детето да се обвитка во чаршави натопени со млака вода или алкохол и истите да се менуваат штом ќе се исушат од топлината на телото. Кај деца коишто се посебно осетливи на покачена температура и реагираат со појава на конвулзии (грчеви) треба да се спроведе профилакса на истите со давање на таблетки или чепчиња според препораката од матичниот педијатар.
При екстремно високи температури најдобро е телото на детето да се обвитка во чаршави натопени со млака вода или алкохол и истите да се менуваат штом ќе се исушат од топлината на телото
Давањето на антибиотици во случај на вирусна инфекција е погрешно, а најчесто родителите самоволно го прават тоа. Дури може да дојде до влошување на состојбата на детето и накалемување на многу посериозни бактериски инфекции. Во секој случај треба да се направи консултација со педијатар и доколку е потребно да се направат лабораториски иследувања кои би ја олесниле диференцијацијата помеѓу вирусната и бактериската инфекција.
На прашањето како да се заштитиме од вирусните инфекции, одговорот е да се консумира поголемо количество на витамин Ц по природен пат, прошетки на свеж воздух и избегнување на места каде што има собирање на повеќе луѓе. За превенција од грип се препорачува вакцинирање на децата кои страдаат од хронични заболувања, како би се заштитиле од компликациите.
