„Дали сум лоша личност ако не ја сменам пелената на моето бебе во 3 часот наутро?“, се прашува речиси секој нов родител во првите неколку недели со новороденчето. Одговорот може да изгледа очигледен за некого, но прашањето дали треба да ја смените ноќната пелена навистина не е глупаво прашање. Да, веројатно сте научени дека треба да го пресоблечете вашето бебе после секој подој. Ако ви се чини дека на вашето доенче му е нелагодно, секако дека брзо ќе ја смените пелената. Но, што ако бебето спие мирно по ноќното хранење? Треба да се грижите за потенцијално влажна пелена среде ноќ?
Главниот мотив за менување на пелената е да се осигура дека на нежната кожа на бебето нема да се појави пеленски осип или дека пелената протекува. И, сигурно, ниту еден родител не сака да го остави своето дете предолго да лежи во полна пелена. Бидејќи валканата пелена може да предизвика осип на детскиот задник.
„Има многу малку околности во кои би препорачала будење на заспаното бебе за промена на пелена“, вели Кетлин Мочорук, советник за доење. Ако вашето бебе нема ранички или сериозен пеленски осип што бара следење, оставете го да спие“, советува таа. „Навистина не треба да се грижите за малку урина во пелената, бидејќи урината на децата не е многу концентрирана, па ќе им пречи само во случај ако им пречи што се мокри“.
Ако мирисате или почувствувате дека бебето извршило голема нужда, ќе сакате веднаш да го пресоблечете, но тоа не е неопходно. Изметот на доеното бебе не е многу иритирачки за кожата, па ако добро спие и мислите дека сепак наскоро ќе се разбуди, можете тоа да го одложите за некое време.
Од друга страна, бебе кое се храни со адаптирано млеко ќе бара побрзо менување бидејќи нивниот измет е поверојатно да предизвика пеленски осип. Сепак, ако имате среќа, бебето ќе се разбуди само, бидејќи многу новороденчиња се будат спонтано по голема нужда.
КОГА Е ПОТРЕБНО БУДЕЊЕ?
Будењето поради влажна пелена обично е неопходно само ако детето носи платнени пелени, кои немаат таква способност на апсорпција како пелените за еднократна употреба. И токму поради оваа причина, дури и некои големи поддржувачи на платнени пелени користат пелени за еднократна употреба за време на ноќното спиење.
СОВЕТИ ЗА МИРЕН СОН
Нанесувањето на подебел слој на заштитна крема во текот на ноќта може да биде уште еден начин да се спречи појава на осип доколку влажната пелена остане на бебето подолго време. Исто така, бебето пресоблечете непосредно пред хранење. На тој начин знаете дека ќе спие со релативно сува пелена и нема да ризикувате да го разбудите доколку заспие за време на подојот.
Ако бебето сè уште спие, можеби ќе можете да го пресоблечете без целосно да го разбудите. Светлото нека биде придушено, а просторијата тивка, и движете се полека и мирно. Како што расте детето, ритамот на спиење и полните пелени ќе се менуваат, а исто така ќе се менува и вашата вознемиреност.
„Неизбежно е во првите неколку месеци да имате ноќи каде што ќе пропуштите промена на пелена или две и нема смисла да се чувствувате виновни поради тоа. На бебето навистина ништо нема да му се случи“, вели Мочорук.
