Во текот на првиот бран на пандемијата со новиот коронавирус се создаде научен консензус според кој децата би можеле да бидат важен фактор во ширењето на новиот коронавирус, како што е случај кога е во прашање вирусот на грип. Но, потоа стигна летото и превагна друга теорија – неколку студии укажуваат на тоа дека децата, особено помалите, не се така заразни за околината.
“Научната литература тоа не го разјасни“, вели епидемиологот Доминик Костаглиола од Сорбона.
Факт е дека бројни студии што излегоа изминатава пролет, покажаа дека децата, кои ретко покажуваат симптоми на ифекција со коронавирусот, не се високо заразни за останатите членови на семејството, но тоа беше време кога училиштата беа затворени, а ширењето на вирусот беше забавено, подвлекува епидемиологот Зои Хајд , професорка на Универзитетот на западна Австралија.
“Повеќето студии во однос на КОВИД-19 и децата се спроведени за време на карантин или во време на низок пренос на вирусот во заедницата“, вели проф. Хајд. Но, некои нови студии од САД, Индија и Јужна Кореја ја доведоа во прашање претпоставката за тоа дека децата не се толку заразни.
Американскиот центар за контрола и превенција на болести (CDC) објави резултати од студија спроведена на 300 лица во која беше заклучено дека “трансмисијата на коронавирусот помеѓу членови на семејството е честа, без оглед дали станува збор за возрасни лица или деца“.
Многу поширока британска студија, објавена минатат недела покажува поинаква слика.
“Живеењето со деца до 11 годишна возраст не е поврзано со зголемен ризик од инфекција со коронавирус, развојот на болеста КОВИД-19 или сместувањето во болница“, покажало истражувањето на Школата за хигиена и тропска медицина во Лондон и Универзитетот во Оксфорд, кое се темели на податоци собрани од над девет милиони возрасни.
Децата од 12 до 18 години претставуваат одреден ризик, но мал, стои во заклучокот на студијата.
“Децата можат да го пренесат вирусот меѓу останатите“, изјави епидемиологот на Светската здравствена организација, Марија Ван Керхов, “но се чини дека тоа се случува поретко отколку меѓу возрасните“.
Помалите деца меѓусебе вирусот поретко го пренесуваат, во споредба со тинејџерите меѓусебе, бидејќи кај нив стапката на инфекција е речиси еднаква како кај возрасните.
“Кога имаат симптоми, децата испуштаат слична количина на вирусот како возрасните и може да заразат други лица, како што тоа го прават возрасните“, објави во август европскиот Центар за превенција и контрола на болести. “Не е познато каква е ситуацијата со заразените асимптоматски деца“.
Ако можноста децата да го пренесуваат коронавирусот е двосмислена, нема никаков сомнеж дека тие општо се или асимптоматски или имаат полесна форма на болеста во споредба во возрасните.
РИЗИКОТ НЕ Е НУЛА
Повеќето училишта во многу земји беа затворени за време на пролетниот карантин што го компромитираше образованието на децата и предизвика голем притисок на родителите.
“Сите сфаќаат колку училиштата се важни за децата, не само за образованието, туку и за нивното менталното здравје и безбедност“, смета Ван Керхов. “Во некои случаи децата таму и се хранат“.
Многу земји, како Франција, Велика Британија, Ирска и Австрија повторно воведоа национален карантин, целосен или парцијален, со цел да го стопираат вториот бран на ширење на вирусот, но овој пат училиштата ги оставија отворени.
“Ризикот поврзан со училиштата не е нула и тоа никој не го тврди. Но, изолираните случаи сепак мораат да се стават во перспективата. Голем број училишта во светот и натаму се отворени и во најголем процент нема проблеми“, сметаат француските здравствени власти.
