Ако некогаш сте виделе дете кое родителите го водат на поводник, веројатно сте се шокирале и веднаш, барем во себе, сте ги осудиле мајката и таткото кои го третираат детето како да е куче.
Меѓутоа, кога со мали деца треба да поминете низ гужва и се плашите дека едно од нив би можело да се изгуби, поводникот веќе и не ви изгледа толку страшно, нели? Сепак, експертите велат дека не постои ситуација во која таквиот начин на водење на детето е оправдан и дека дефинитивно треба да барате друго решение, пишува „Fatherly“.
„Имам четири деца и некои од нив се доста живи и енергични, па понекогаш е тешко да ги држам сите блиску и на повидок“, вели д-р Нил Хорен, директор на Центарот за развој на деца на Универзитетот Џорџтаун. Сепак, тој предупредува дека чинот на врзување со поводник на децата може да се сфати како форма на агресија.
Повлекувањето на поводникот кога ќе отиде предалеку детето го доживува слично како удар, вели Хорен, а да не зборуваме дека ако случајно го повлечете премногу силно, може да изгуби рамнотежа и да се повреди. А ако јажето, не дај Боже, се замота околу вратот на детето, постои реална опасност од задушување.
Чинот на врзување со поводник на децата може да се сфати и како форма на агресија
„Сепак, важно е да се напомене дека поводниците за деца и нивните физички и психолошки ефекти сè уште не се добро проучени, па затоа е невозможно да се каже колку деца се повредени на овој начин и дали и како тие влијаат на детската психа, вели психологот.
Уште поважно, додава тој, поводниците всушност не го учат детето ништо. Кога ги воспитуваме нашите деца, секогаш бараме можности да ги научиме на некои животни вештини, а поводникот не помага да го научиме на ниедна. Тоа, исто така, испраќа негативна порака до детето што може да ја наруши неговата самодоверба.
„Не гледате возрасни луѓе на поводници, нели? Само кучиња, а од неодамна и деца“, вели Хорен.
Како да се снајдете во гужва со деца?
Според детскиот психијатар Хауард Прат, ако одлучите да одите некаде со толку многу мали деца, клучна е подготовката. Тој советува да им повторувате на децата неколку пати пред да заминете дека кога ќе видат нешто што им се допаѓа, не смеат сами да отидат и родителот да не знае каде се, и никогаш да не се одвојуваат од семејството, т.е. од возрасните.
Потсетете ги дека сите се држиме за рака во толпа, а ако се се уште премлади за да го сфатат тоа, добро е да ги возите во количка. А за ваквите правила да имаат ефект, тие мора да се спроведуваат секој ден.
