Ново истражување на американската организација Извиднички откри загрижувачки податоци за менталното здравје на девојчињата, укажувајќи на итна потреба од повеќе ментори во нивните животи. Повеќе од половина девојчиња на возраст од 5 до 13 години ја доживуваат идејата за растење како застрашувачка, а како главни причини се наведуваат притисокот од социјалните мрежи и промените во светот по пандемијата.
Адолесценцијата сама по себе е период на големи промени и анксиозност. Девојчињата се соочуваат со страв дека нивниот изглед, тело, амбиции, ставови, па дури и сексуалноста во развој постојано се набљудуваат и оценуваат. Дополнително, мора да бидат свесни за заканите по нивната безбедност, а често се соочуваат и со притисок да одлучат уште рано дали ќе се посветат на кариера, семејство или ќе се обидат да ги усогласат двете.
Затоа не изненадува што девојчињата чувствуваат сè поголема анксиозност за иднината. Според податоците, дури 54 проценти од девојчињата на возраст од 5 до 13 години изјавиле дека растењето им изгледа застрашувачко или преоптоварувачко.
Овој процент се зголемува на 60 проценти кај девојчињата на возраст од 11 до 13 години. Истражувањето како една од причините го наведува „хипердигиталниот“ свет на социјалните мрежи, како и промените што ги донесе пандемијата на КОВИД-19.
Како да се намали анксиозноста кај девојчињата
Извидничките истакнуваат дека еден од клучните начини за намалување на оваа анксиозност е обезбедување менторство и поддршка уште од најрана возраст.
„Девојчињата растат во свет кој се менува побрзо од кога било и го носат товарот на тие промени додека сè уште се обидуваат да бидат деца“, изјави Бони Барчикoвски, извршна директорка на американските Извиднички.
„Затоа е исклучително важно девојчињата во своите животи да имаат возрасни кои им даваат поддршка – кои ќе им помогнат да се снајдат во светот околу нив, да изградат самодоверба и да развијат вештини што ќе им користат и во иднина.“
Организацијата препорачува возрасните да стават акцент на градење самодоверба и отпорност кај девојчињата. Исто така, важно е да ги учат на животни вештини, како финансиска писменост, и со сопствен пример да им покажат како да ги остварат своите цели, а притоа да се грижат за себе.
Со нагласување на овие вредности, возрасните им помагаат да разберат дека не мора да го жртвуваат самопочитувањето и своите принципи за да бидат успешни и среќни.
Постигнувањата се поважни од изгледот
Истражувањето донесе и позитивни вести. Иако платформите како Инстаграм често го ставаат изгледот во преден план и наметнуваат нереални стандарди за убавина, дури 85 проценти од девојчињата изјавиле дека им се восхитуваат на другите поради тоа што можат да направат, а не поради тоа како изгледаат.
И покрај сите притисоци и осуди со кои се соочуваат, повеќето девојчиња сè уште веруваат дека нивните соништа и постигнувања вредат да се остварат. Тоа е охрабрувачка порака за сите возрасни дека, и покрај предизвиците, работите сепак можат да завршат добро.
