Нашата земја бележи значителен пад на смртноста кај новороденчињата, лекувани на Клиниката за гинекологија и акушерство, на Одделението за интензивна нега и терапија. „Гледајќи по години наназад во 2016 била 25%, 2017-21%, 2018-16%, 2019-12%, додека годинава 10%, од вкупно третираните бебиња на одделението за интензивна нега и терапија“, се вели во дописот од Министерството за здравство.
Министерот за здравство д-р Венко Филипче денеска беше во посета на Клиниката за гинекологија и акушерство на Одделението за интензивна нега и терапија, каде се третираат предвреме родени бебиња. Во разговор со директорката на клиниката д-р Викторија Јовановска и началничката на одделението д-р Рената Димитриоска, министерот беше информиран дека во извештајот за 2020 се бележи значителен пад на смртност кај новороденчиња, лекувани на одделението за интензивна нега и терапија.
Од Министерството истакнуваат дека намалувањето на смртноста во перинаталниот период се должи на големите вложувања што се направени во изминатите три години во овој сегмент од здравството – во опрема, едукација и проширување на стручните тимови на Одделението за интензивна нега на Гинеколошко-акушерската клиника.
Согласно најновиот извештај на УНИЦЕФ, нашата земја е рангирана меѓу првите три земји во светот со најголем пад на стапката на смртност кај новороденчиња.
