Оваа масажа може да ја практикува целото семејство, што повеќе тоа подобро. Меѓутоа, целосно е ефикасна и комбинацијата родител и дете. Се практикува веќе дваесетина години во шведските градинки, каде со долгогодишна пракса и истражувања, направени на оваа тема, покажале брзи и ефикасни резултати. Пронајдете мирно место во вашиот дом и понудете му ја на детето оваа активност, ќе се изненадите од неговата реакција.
Осум едноставни вежби
- Сите вдишете длабоко, па полека издишувајте. Целта е да создадете опуштена атмосфера.
- Детето нека пронајде положба која нему му одговара, но имајте на ум дека треба да имате пристап до грбот. Ставете ги рацете на рамото на детето. Бројте до 10 и дозволете му на детето да се навикне на вашиот допир.
- Три пати со раката поминете низ рамениците и грбот на детето. Првиот пат преку рамената, а потоа два пати по горниот дел од грбот Движењата направете ги со целата дланка.
- Почнете со масажа на рамената. Со лесно темпо поминувајте со дланките преку рамената и вратот. Правете кружни движења.
- Додека едната рака и понатаму ви е на рамото на детето, ставете го палецот на дланката на другата рака и правете кружни движења преку целиот грб.
- Потоа со прстите полека и внимателно притискајте ја кожата на детето. Почнете од рамениците и завршете кај лактите. Значи ова е масажа за горниот дел од раката. Повторете неколку пати.
- Повторно вратете ги прстите на рамениците и лесно притискајте ги.
- Завршете така што повторно ќе преминете три пати преку рамената и грбот.
Не се оптоварувајте како ќе ги правите движењата. Овде е поважна самата активност и блискост со детето. Детето секогаш се чувствува подобро кога родитеите ќе му посветат внимание само нему. Дозволете му на детето истата масажа да ви ја направи и на вас. Кажете му дека оваа масажа ви помага и на вас да се опуштите. Нема ништо лошо во тоа детето да знае дека и на вас ви е потребна помош со емоциите, стресот и нервозата.
Стручњаците велат дека децата по овие масажи стануваат мирни, помалку агресивни, подобро сконцентрирани, развиваат емпатија кон другите. Интересен е фактот дека при овие масажи во телото лачи хормон окситоцин или како што го нарекуваат хормон на среќа, како во телото на родителите, така и во телото на детето. Нивото на овој хормон брзо опаѓа, но неговите ефекти траат многу подолго.
