Кога вашето дете ќе дојде на возраст кога ќе почне да се движи и да фаќа работи со рачињата, за него се отвора сосема нов свет. Тие го откриваат светот околу себе на многу различни начини, вклучително и ставање во уста на сè што ќе им дојде под рака. Имајќи го ова на ум, експертите ги издвојуваат најчестите работи кои претставуваат опасност од гушење кај малите деца.
ХРАНА
Кога се споменува гушење кај децата, повеќето родители прво помислуваат на храна. Имено, ова е една од најчестите причини поради кои доаѓа до задушување, предупредуваат експертите. Несреќен е податокот дека гушењето е четврта причина за ненамерна, случајна смрт кај деца под пет години.
Затоа, за да го заштитите вашето дете колку што можете повеќе за време на ужините и оброците, погрижете се целата храна што ќе ја послужите да биде исечена на мали парчиња кои детето лесно може да ги џвака. Исто така, подобро е да избегнувате одредени видови храна. Тоа се намирници како виршли, пуканки, цели јаткасти плодови, сушено овошје, грозје и тврд суров зеленчук или овошје.
ИГРАЧКИ
Покрај храната, голема опасност од гушење кај децата претставуваат и играчките, особено минијатурните или играчките кои се состојат од многу ситни делови. Имено, постои опасност детето со оглед на тоа што во таканаречената „орална“ фаза става апсолутно се во уста, да стави и парчиња играчки во устата. Тоа се претежно коцки, балони, кинетички песок, батерии, копчиња, мониста или други украсни предмети кои често се наоѓаат на детските играчки.
ПРЕДМЕТИ ВО ДОМОТ
Вообичаените предмети за домаќинството кои можат да претставуваат опасност од гушење вклучуваат завртки, клинци, батерии кои вообичаено се наоѓаат во далечинските управувачи, иглички, магнети, мали кесички со детергент, монети, лекови и храна за домашни миленици. Експертите затоа предупредуваат дека потенцијално опасните предмети треба да се чуваат подалеку од деца.
