Интервју со д-р Александра Михајловска: Ги повикувам сите родители да ги вакцинираат децата кои се невакцинирани

Aпелирам до родителите да ги вакцинираат своите деца од една единствена причина, а тоа е дека вакцините се квалитетни, безбедни и секако, најголемиот кост-бенефит од истата е сигурна заштита на своите деца од многу опасните болести кои, за жал, беа на работ на своето искоренување

Вакцините се квалитетни и безбедни и се единствен начин да се заштити колективниот имунитет: Д-р Александра Михајловска, специјалист педијатар
ПИШУВА:
Катерина Шекеровска-Димовска
katerina@pedijatar.mk

 

„Мајка сум на две малолетни деца, и двете се навремено вакцинирани и ревакцинирани онака како што налага календарот на вакцинација во нашата држава. Во ниту еден момент не сум размислувала за невакцинирање, секако, моите најблиски го знаат мојот став околу вакцината, истиот е секогаш прифатен и нивните деца се вакцинирани“, категорична е д-р Александра Михајловска, специјалист педијатар од Битола, која апелира родителите да ги вакцинираат своите деца. „Не постојат научни докази за поврзаност на аутистичните однесувања и МРП вакцинацијата, зашто во основата на тоа заболување е генетиката“, објаснува д-р Михајловска, потенцирајќи дека вакцините се квалитетни и безбедни и се единствен начин да се заштити колективниот имунитет.

ЗАШТИТА И ИСКОРЕНУВАЊЕ Од имунолошки апсект е оправдана имунизацијата со што се заштитува детето, но придонесува и за искоренување на болеста

 Во последнава недела имаме рекорден број на новозаболени од морбили, дури 134 лица. Епидемијата добива на интензитет и нема изгледи дека во скоро време ќе стивне. Кои се Вашите препораки до родителите кои се уште одбиваат да ги вакцинираат своите деца?

Д-р Михајловска: За жал тоа е вистината која во моментов ја имаме, а мојот став околу ова прашање е јасен и недвосмислен. Јас како педијатар апелирам до родителите да ги вакцинираат своите деца од една единствена причина, а тоа е дека вакцините се квалитетни, безбедни и секако, најголемиот кост-бенефит од истата, е сигурна заштита на своите деца од многу опасните болести кои, за жал, беа на работ на своето искоренување. Ја поддржувам иницијативата за имунизација на децата со МРП вакцина. Од имунолошки апсект е оправдана имунизацијата со што се заштитува детето, но придонесува и за искоренување на болеста. Ги повикувам сите родители да ги вакцинираат децата кои се невакцинирани. Вакцините се квалитетни и безбедни, и се единствен начин да се заштити колективниот имунитет.

Студијата која во 1998 год. го подигна сомнението дека постои врска меѓу аутизмот и МРП, подоцна се покажа дека има сериозни пропусти и дека е лажна. Таа била повлечена од списанието, но за жал паниката која предизвика страв меѓу родителите доведе до намалување на бројот на вакцинации мегу децата, а со тоа опаѓање на колективниот имунитет

Во опасност сме од враќање на искоренети болести, кои може да имаат навистина сериозни последици, па дури и фатални. Свесни ли се родителите за опасноста која се заканува, а се решава едноставно, со имунизација, која е една од најголемите придобивки за човештвото?

Д-р Михајловска: Пред ерата на вакцинирањето според Светската здравствена организација (СЗО) ова заболување било причина за 2,6 милиони смртни случаи годишно. Со воведување на живата атенуирана вакцина, ова заболување e невообичаено за поголем дел од развиените земји. Појавата на миниепидемии во ерата на вакцинацијата е резултат на антивакциналната кампања која на голема врата се шири, правејќи го ова заболување причина за зголемување на морталитетот кај децата.

МРП Не постојат научни докази за поврзаност на аутистичните однесувања и МРП вакцинацијата

Дали Вие ги вакциниравте своите деца, дали ги упатувате роднините и блиските да се вакцинираат со МРП вакцината без страв од развој на аутизам или некакви други последици? Всушност, постои ли научен доказ за поврзаност на МРП вакцината и аутистичните нарушувања?

Д-р Михајловска: Јас сум мајка на две малолетни деца, и двете се навремено вакцинирани и ревакцинирани онака како налага календарот на вакцинација во нашата држава. Во ниту еден момент не сум размислувала за невакцинирање, секако, моите најблиски го знаат мојот став околу вакцината, истиот е секогаш прифатен и нивните деца се вакцинирани.

Појавата на миниепидемии во ерата на вакцинацијата е резултат на антивакциналната кампања која на голема врата се шири, правејќи го ова заболување причина за зголемување на морталитетот кај децата

Околу прашањето дали постојат научни докази за поврзаност на аутистични однесувања и МРП вакцинација, одговорот е едно големо НЕ, зашто во основата на тоа заболување е генетиката. Студијата која во 1998 год. го подигна сомнението дека постои врска меѓу ова нарушување и МРП, подоцна се покажа дека има сериозни пропусти и дека е лажна. Таа била повлечена од списанието, но за жал паниката која предизвика страв меѓу родителите доведе до намалување на бројот на вакцинации меѓу децата, а со тоа опаѓање на колективниот имунитет.

Најголемиот кост-бенефит од вакцинацијата е сигурна заштита на своите деца од многу опасните болести кои, за жал, беа на работ на своето искоренување

Покрај вакцинацијата, што е она за кое родителите најмногу бараат совет од Вас во овој период од годината?

Д-р Михајловска: Покрај прашањето за вакцината, во овој период најчесто бараат совет околу алергиите, околу тоа како да го заштитат своето дете од вирусни, па и бактериски инфекти, посебно децата кои се во колективен начин на живот поточно  посетуваат градинки (3-6 год).

Кој е Вашиот став во однос на широкиот повој и употребата на дубаче? Препорачувате или не?

Д-р Михајловска: Мојот став околу широкиот повој е тоа дека треба да се става до 6 месеци кај машките, а до 7 месеци кај девојчињата. Тоа се месеците кога јадрата се веќе формирани. А на прашањето за користење на дубаче – тука сум децидна дека не го дозволувам заради опасноста од повреди кај децата.

Кога е детето подготвено за одвикнување од пелени?

Д-р Михајловска: Децата се разликуваат по се, па така кога станува збор и за ова прашање. Психолошката зрелост на детето зборува дека тоа станува зрело и способно да ги контролира своите физиолошки потреби помеѓу 18-24 месеци.