Повеќето болести кај бебињата и децата се благи и не бараат медицински третман. Но, ако се сомневате во нешто посериозно, треба да побарате медицинска помош. Вие го познавате вашето дете најдобро. Доколку сте загрижени, однесете го на доктор.
Постојат општи знаци на сериозна болест што треба итно да ве поттикнат да побарате медицинска помош. Овие вклучуваат:
- силна болка што го буди детето од сон,
- треска или болка без очигледна причина,
- болка што се влошува,
- болка проследена со други симптоми како треска, повраќање или дијареја,
- треска кај бебе помладо од 3 месеци,
- треска што предизвикува тресење (морници).
Други знаци што бараат итна медицинска помош се:
Намалена будност или раздразливост
Ако вашето дете:
- е необично поспано или млитаво,
- не реагира на дразби,
- има висок, континуиран плач.
Промени во дишењето
Ако вашето дете:
- има тешкотии со дишењето,
- дише пребрзо,
- има плитко дишење,
- испушта звуци (стенкање) при дишење.
Промени во бојата на кожата и изгледот
Ако вашето дете:
- е бледо или модро,
- има црвенкаст или виолетов осип што не исчезнува кога ќе се притисне.
Ризик од дехидрација
Ако вашето дете:
- одбива да пие течности,
- не мокри, или има значително помалку мокри пелени од вообичаено,
- постојано повраќа.
Кога треба да повикате брза помош?
Повикајте итна медицинска помош (194) или однесете го вашето дете во најблиската ургентна установа ако:
- вашето дете е многу поспано и не реагира,
- има тешкотии со дишењето,
- неговиот плач се менува во висина или јачина или плаче непрекинато,
- неговата кожа е бледа, дамкава или модра,
- добие напад (конвулзија),
- има осип што не исчезнува кога ќе се притисне,
- одеднаш му се влоши состојбата.
Детски болести што бараат итна медицинска помош
Повеќето детски болести се благи и не бараат третман, но некои можат да бидат сериозни. Побарајте лекар ако се сомневате дека вашето дете има некоја од следниве состојби:
Менингитис
Менингитис е воспаление на мембраните околу мозокот и рбетниот мозок, обично предизвикано од инфекција. Менингитисот може да биде животозагрозувачки. Симптомите вклучуваат:
- главоболка,
- болка и/или вкочанетост во вратот,
- повраќање,
- чувствителност на силна светлина.
Може да се појави и осип што не исчезнува кога ќе се притисне кожата.
Напад (конвулзија)
Нападите се предизвикани од некоординирана електрична активност во мозокот. Тие можат да предизвикаат вкочанетост, тресење на рацете и нозете и губење на свеста.
Децата можат да добијат напад кога имаат висока температура (фебрилни конвулзии).
Побарајте итна медицинска помош ако:
- ова е прв напад на вашето дете,
- нападот трае повеќе од 5 минути,
- вашето дете има проблеми со дишењето,
- вашето дете се повредува за време на нападот.
Инфекција на уринарниот тракт (УТИ)
Инфекцијата на уринарниот тракт е инфекција на мочниот меур, уретрата, уретерите или бубрезите. Симптомите вклучуваат:
- печење или болка при мокрење,
- зачестена потреба за мокрење,
- крв во урината,
- треска,
- непријатно чувство во долниот дел од стомакот.
Доколку не се лекува, инфекцијата може да се прошири на бубрезите. Посетете лекар ако вашето дете ги има овие симптоми или ако урината му е розова, црвена или кафеава.
Пневмонија
Пневмонија е воспаление или инфекција на белите дробови предизвикана од бактерии или вируси. Често се развива по настинка. Симптомите вклучуваат:
- висока температура,
- забрзано и отежнато дишење,
- кашлица,
- повраќање,
- болка во градите.
Лекарот може да го третира вашето дете дома, но може да го упати во болница ако:
- е помладо од една година,
- има сериозни проблеми со дишењето,
- не може да земе лекови,
- е дехидрирано.
Сепса
Сепса (труење на крвта) е сериозна инфекција на крвта предизвикана од бактерии. Побарајте итна медицинска помош ако вашето дете:
- има дамкава, модра или бледа кожа,
- е многу поспано и без енергија,
- е ладно на допир,
- дише многу брзо,
- има осип што не исчезнува кога ќе се притисне,
- има напад.
Астма
Астмата е честа кај децата и предизвикува отежнато дишење, кашлање и свирење во градите. Околу 1 од 4 деца ќе има визинг во градите барем еднаш.
Но, астмата може да биде итен случај ако:
- вашето дете има силно отежнато дишење, кашлица или пискање,
- се забележува „вовлекување“ на кожата меѓу ребрата при дишење,
- инхалаторот (пумпата) не помага,
- не може да изговори цела реченица поради отежнато дишење,
- усните му стануваат модри,
- симптомите нагло се влошуваат.
Анафилакса
Анафилакса е тешка алергиска реакција што може да биде животозагрозувачка. Децата со анафилакса треба да примат инјекција адреналин (како ЕпиПен или Анапен).
Повикајте брза помош ако вашето дете:
- има отежнато или бучно дишење,
- има отeчен јазик,
- има оток или стегање во грлото,
- не може да зборува или има засипнат глас,
- има визинг или упорна кашлица,
- има перзистентна вртоглавица или губи свест,
- станува бледо и млитаво (кај мали деца).
Ако имате дајте адреналин и повикајте брза помош (194). (Healthdirect)
