Многупати сме слушнале дека мајчиното млеко се споредува со магична напивка. Тоа е вистина. Тоа се менува во зависност од потребите на бебето, помага во борба против алергии, се бори со болести и го јакне имуниот систем.
Во моментов постојат теории дека мајчиното млеко може да помогне и во борба со новиот коронавирус.
Една од причините зошто мајчиното млеко е толку моќно, е тоа што содржи антитела кои им помагаат на бебињата да се изборат со болестите. Антителата се важен дел од имуниот систем кај човекот. Кога вирусот, бактеријата или нешто друго го напаѓа телото, нашите клетки создаваат антитела кои се борат со инфекцијата.
Антителата се можеби клучниот дел од битката со епидемијата на КОВИД-19.
Научниците моментално работат на создавање на тест кој ќе покаже дали човекот има антитела на коронавирусот, и дали може да се избори со инфекцијата. Многу научници веќе истакнуваат дека голем број луѓе кои се инфицирани, а кои немаат симптоми, веројатно тоа воопшто и не го знаат.
Ребека Пауел е научник кој го испитува присуството на антитела во млекото на ените кои биле изложени на коронавирусот. Иако многу експерти се фокусираат на антителата во крвта, таа се фокусирала на истражување за мајчиното млеко.
Нејзината теорија е дека мајките кои дојат можеби развиле антитела како одговор на вирусот, и тие преку млекото се пренесуваат на детето. Без разлика на тоа дали мајката е позитивна на КОВИД-19 или не, ако била изложена на вирусот, нејзиното тело веројатно почнало да создава антитела. Со самото тоа, од вирусот станува заштитена и таа и нејзиното бебе.
