Ново истражување: Татковците чувствуваат поголем родителски притисок од мајките – најмногу поради социјалните мрежи

Иако често се зборува за притисоците со кои се соочуваат мајките, ново истражување покажува дека татковците всушност чувствуваат поголем родителски притисок, особено оној што доаѓа од социјалните мрежи. Студијата, во која учествувале родители на возраст од 18 до 45 години, открива не само разлики во начинот на кој мајките и татковците го доживуваат родителството, туку и значајни разлики меѓу милениумците и генерацијата З. Според новиот извештај на компанијата Moonbug Entertainment, која стои зад популарните детски содржини како CoComelon и Blippi, милениумците и родителите од генерацијата З му пристапуваат на семејниот живот на многу различни начини. За извештајот, истражувачите анкетирале 1.000 родители во САД на возраст од 18 до 45 години кои имаат најмалку едно дете помладо од 10 години. Студијата нуди интересен увид во промените во родителството, како меѓу генерациите, така и во однос на родовите улоги. „Она што најмногу ми остави впечаток во ова истражување е колку поинаку изгледа родителството зад затворени врати. Мајка која сама се грижи за домаќинството и се прашува дали некој воопшто го забележува тоа. Татко кој среде ноќ ги прегледува објавите на родителите-креатори на содржини и се прашува дали прави сè како што треба“, вели Јохана Москосо, главна авторка на студијата. „Родител од генерацијата З кој свесно прави сè спротивно од начинот на кој бил воспитуван. Тоа не се изолирани случаи. Тоа е модерното семејство“, додава таа.

 

Разлики меѓу генерациите: Милениумци и генерација З

Студијата покажува оти повеќе не постои единствена дефиниција за „модерен родител“. Разликите во родителството меѓу генерациите се обликувани од различни притисоци, приоритети и сфаќања за тоа што значи да се биде добар родител. Истражувањето покажува дека 87 проценти од милениумците веруваат дека родителството е централен дел од нивниот идентитет. Кај родителите од генерацијата З, овој процент изнесува 80 отсто, што укажува дека тие го гледаат родителството како само еден дел од својот поширок идентитет. Значајни се и разликите во пристапот кон воспитувањето. Дури 44 проценти од милениумците ги воспитуваат своите деца на сличен начин како што биле воспитувани самите. Од друга страна, генерацијата З избира свој пат: 20 проценти велат дека практикуваат сосема поинаков родителски стил, а 12 проценти намерно постапуваат спротивно од начинот на кој биле воспитувани.

Кога станува збор за стиловите на родителство, постојат интересни генерациски разлики. Милениумците почесто се идентификуваат со конкретен стил на воспитување отколку родителите од генерацијата З. Така, 38 проценти од милениумците се препознаваат во т.н. нежно родителство, во споредба со 31 процент од родителите од генерацијата З.Од друга страна, 21 процент од милениумците се сметаат за „природни родители“ – термин што се однесува на родители кои практикуваат поздрав, похолистички и поодржлив начин на живот. Кај генерацијата З овој процент изнесува 15 отсто. Најмала разлика има кај таканареченото „слободно родителство“, каде 26 проценти од милениумците и 25 проценти од генерацијата З се идентификуваат со овој пристап.Интересно е што и меѓу мајките и татковците постојат разлики. Дури 42 проценти од татковците милениумци се наклонети кон нежното родителство, во споредба со 31 процент од мајките милениумки. Сличен тренд е забележан и кај генерацијата З.

Терминот „мајчина вина“ често се споменува кога се зборува за родителството, но ова истражување покажува дека и „татковската вина“ е многу реална. Иако е познато дека мајките често се споредуваат со другите родители на интернет, истражувањето покажува дека тоа го прават 37 проценти од нив. Но, уште поголем е процентот кај татковците – дури 53 проценти признаваат дека се споредуваат со другите родители на социјалните мрежи. Голем дел од овој притисок доаѓа токму од дигиталните платформи. Речиси половина од татковците (49%) велат дека чувствуваат родителски притисок поради содржините на социјалните мрежи, во споредба со 38 проценти од мајките.Кога станува збор за општиот притисок од околината да ги воспитуваат децата на одреден начин, така се чувствуваат 51 процент од татковците и 41 процент од мајките.

Повеќето родители веруваат дека грижата за себе им помага да бидат подобри родители, но многумина и понатаму чувствуваат вина кога одвојуваат време само за себе. Истражувањето покажува дека 61 процент од родителите чувствуваат вина кога си посветуваат време на себе, иако 78 проценти сметаат дека одморот ги прави подобри родители.И тука постојат генерациски разлики. Дури 82 проценти од милениумците велат дека времето за себе позитивно влијае на нивното родителство, додека кај генерацијата З овој процент е 73 отсто. Според истражувачите, „генерацијата З не ја отфрла грижата за себе, но сè уште преговара со неа. Сè уште одлучува дали навистина има право на неа без чувство на вина“.

Интересен податок е дека милениумците почесто користат вештачка интелигенција за родителски совети отколку генерацијата З. Така, за истражување производи вештачка интелигенција користат 44 проценти од милениумците, наспроти 32 проценти од припадниците на генерацијата З. За планирање оброци соодносот е 41 наспроти 32 проценти, а за родителски совети 40 наспроти 28 проценти. Дополнително изненадува податокот дека 26 проценти од мајките од генерацијата З воопшто не користат алатки базирани на вештачка интелигенција. Сепак, Ју-Тјуб останува главната платформа за родителите. Дури 76 проценти од испитаниците ја користат оваа мрежа, пред Фејсбук (69%), Инстаграм (66%) и ТикТок (62%). Без разлика на платформата, родителите најмногу ја ценат автентичноста. Дури 70 проценти велат дека повеќе сакаат природна и искрена содржина отколку совршено уредени и професионално продуцирани објави, што, според авторите на извештајот, покажува јасна предност на реалноста пред совршенството.