ОДВИКНУВАЊЕ ОД ПЕЛЕНИ: Како на една мајка и успеало невозможното – да ги одвикне своите деца од пелени за само три дена

Мора да бидете психички подготвени да се затворите во куќата три дена и да го научите вашето дете како да биде без пелени, објаснува Холин Паркинсон, мајка на три деца

Одвикнувањето на детето од пелени воопшто не е лесен процес, но оваа мајка тврди дека успеала да го направи токму тоа во рок од само три дена. Холин Паркинсон, која е мајка на три деца, разговараше за нејзиниот метод во видеото на TikTok кое веќе достигна 3,3 милиони прегледи.

Таа го започнува видеото жалејќи се дека не можела да го поднесе менувањето пелени откако нејзините деца наполниле една година. „Мора да бидете психички подготвени да се затворите во куќата три дена и да го научите вашето дете како да биде без пелени“, објаснува Паркинсон, откривајќи дека се подготвувала за периодот на одвикнување со купување на различни сокови и храна богата со влакна, за да го одржува редовното варење на нејзините деца.

„Овој период го бара вашето целосно внимание. Мислам, дури не ни гледате во вашиот телефон. Со сите три деца, телефонот беше далеку од мене, бев вклучена со нив на подот и правевме сложувалки, си игравме со автомобили и немав ништо во моите раце за да можам секогаш да им бидам достапна“, вели таа.

Три дена нејзините деца јаделе храна погодна за цревата, додека таа одговарала на секоја нивна потреба да го користат нокширчето. Паркинсон тврди дека била успешна во своите напори да ги одвикне од пелени. Подоцна открила дека советите за одвикнување од пелени дошле од одлични родители кои ги испробале овие трикови пред неа.

Во видеото, мајката открила дека научила да ги препознава знаците на детето кои ѝ кажуваат дека треба да седне на нокширче, како што се соблекување на пелените во време на спиење. Исто така, таа тврди дека е клучно родителите да разговараат со своите деца за вадењето пелени и користењето на нокшир или тоалет. Нејзиното видео за кратко време стана вирално, а патем многу родители ја контактираа заблагодарувајќи и се за корисните совети.

„Твоите совети ми го спасија животот и навистина имаат смисла“, „Благодарение на ова видео успеав да ги одвикнам моите деца, како и тројца внуци од пелени. Мојот син имаше една година, а ќерка ми немаше ни толку. Благодарам“ се само дел од позитивните коментари.

Меѓутоа, тактиката на оваа мајка да се затвора во куќата полни три дена не им се допаднала на  сите родители, бидејќи како што велат, за некои од нив таа не е изводлива.

„Јас сум самохрана мајка која работи секој ден и не можам да бидам дома три дена без прекин. Немам кој да ми помогне, полесно ми е да менувам пелени“, напишала една мајка.