Брнаутот или синдром на согорување кај родителите се карактеризира со емоционална и физичка исцрпеност. Брнаут е кога се чувствуваме исцрпени, но не можеме доволно да се одмориме за да ја обновиме нашата енергија. Од време на време, секој може да доживее замор. Обично, со малку одмор или добар сон, овој замор исчезнува. Но, согорувањето изгледа поинаку. Исцрпеноста се јавува кога постојано ги поместуваме границите на нашите ресурси или ги игнорираме предупредувањата на нашиот ум и тело.
Значи, со оглед на модерниот, брз начин на живот кој ги принудува родителите да работат повеќе задачи за помалку време, согорувањето или брнаутот може да биде очекуван.
„Многу зборувам со мајки кои доживуваат согорување и сакам да ја оспорам идејата дека мајчинството значи да се чувствуваш како најлошата, најчувствителната, најсуровата верзија од себе. Иако тоа може да биде вообичаено, тоа не значи дека е нормално“, вели психотерапевт и мајка на три деца, Ана Матур.
Меѓутоа, за родителите да ја побараат потребната помош, прво е важно да се препознаат симптомите. Поради тоа, Матур споделува пет знаци на родителска исцрпеност кои лесно може да се занемарат.
- Веќе не уживате во работите кои порано ве правеле среќни, на пример, хобито сте почнале да го сметате за обврска.
- „Добро сум“ е вашиот вообичаен одговор кога ќе ве прашаат како сте.
- Кога имате можност да се одморите, се чувствувате виновни за тоа што сте земале оддишка.
- Вашиот одмор вклучува алкохол или листање по социјалните мрежи.
- Викате повеќе отколку што сакате.
„Согорувањето се случува постепено, не преку ноќ. На ист начин, закрепнувањето од исцрпеноста исто така бара време. Со тоа што ќе станете свесни за вашите потреби и ќе најдете нови начини за нивно изразување и исполнување, повторно ќе ја изградите својата сила“, заклучува Матур.
