РЕЦЕПТ НА ДЕНОТ: Зеленчукови детски крокети

Освен тесто и ориз, компирот е една од намирниците што децата со задоволство ја јадат. Но не може да јадат само компир пире со спанаќ или помфрит или печен компир, зарем не? Овој рецепт комбинира намирници кои имаат сладок вкус и е со текстура и форма прифатлива за децата – КРОКЕТИ. Секако ако не сакате да ги пржите во масло, може да ги подготвите и во рерна.

Потребно:

  • 500гр компир
  • 1 тиквица
  • 100гр рендан кашкавал
  • ½ лажичка сол
  • ½ лажичка црн пипер
  • 2 јајца
  • 100мл кисело млеко или јогурт
  • 4 лажици брашно
  • ½ прашок за печиво
  • Лебни трошки

Подготовка: Излупете го компирот и исечете го на коцки, сварете го и оставете да се олади околу половина час. Тиквицата изрендајте ја, посолете и оставете да отстои 20 минути, а потоа исцедете ја. Изладениот компир изгемечете го во пире (без млеко и путер), малку посолете. Брашното измешајте го со прашокот за печиво. Изматете ги јајцата со јогуртот или киселото млеко на страна. Прво во пирето додадете ги изматените јајца, мешајте со рачна маталка, а потоа додадете ја тиквицата, па ренданиот кашкавал. Се заедно убаво соединете. На крајот додадете го брашното со прашокот за печиво. По потреба додадете сол и црн пипер. Пред да почнете да ги правите крокетите, рацете малку намачкајте ги со масло. Од смесата правете крокети, валкајте ги во лебни трошки и ставете да се пржат. За верзијата без пржење, треба да земате тавче обложено со хартија за печење, да ги наредите крокетите и да ги ставите да се печат во рерна на 180 степени, околу 40 минути. Добар апетит!