Во текот на првата година од животот на бебето, многу работи ќе се променат, од неговото гугање, лазење, проодување, па се до исхраната која драстично се менува. И тоа се благодарение на вашето правилно родителство. Се трудите да го поддржувате и негувате нивниот раст се повеќе и да ги поддржите во се што се обидуваат (да се качуваат, да одат, играат, да ги фатат нивните играчки, да зборуваат).
- Го вежбаме целото тело
Бебето вежба и во текот на седењето, лазењето, одењето, работи на силата на горниот и долниот дел од телото. Ја вежба фината моторика и се изложува на предизвици. За да го поттикнете детето да вежба, можете да го ставите на гради за да го вежба дишењето, движењето со глава, стомачните мускули, вртењето како и обидите за станување. Бебето во првите месеци на стомак може да го ставите две минути. Колку е постаро, тајмингот може да го продолжувате, а кога ќе наполни една година, може да остане дури и 20 минути на стомак.
Може да го ставите бебето и на под, да наредите играчк околу него и да ги гледате неговите обиди да ги дофати. На овој начин децата вежбаат бројни моторички способности.
- Читаме и учиме
Читањето го изложува бебето на нови зборови и звуци на јазикот. Покажувајте му предмети од околината за што побрзо да ги совлада. Од 6 до 12 месеци, веќе ќе почне да му се допаѓаат книги со ликови, форми или животни.
- Зборуваме
Колку повеќе зборувате, пеете и му читате на детето, тоа побрзо ќе научи да ги поврзува поимите. Каде е вујче, каде е тета? Што е маса, а што солица? Што јадеш? Детето ќе знае кога ќе речете чорапи, дека тоа се облекува на стапалата, а кога ќе речете капење, дека тоа ќе си игра во вода и ќе биде чисто. Поттикнете интеракција со детето и ќе видите колку брзо ќе научи многу поими.
- Бидете му поддршка на детето
Кога ќе видите дека вашето дете напредува, навивајте за него, поддржете го. Се покажало дека бебињата кои ги поддржуваат родителите, ги охрабруваат, им се смеат, им аплаудираат кога прават нешто ново, напредуваат многу повеќе и имаат многу поголема желба и мотивација да научат нови работи.
- Број еден – ЗАБАВА
Времето поминато со бебето и играњето му помага да научи многу за околината, да научи многу за причините и последиците, одредени опасности и всушност да види како функционираат работите. Играјќи со вашето дете поттикнувате споделување, разбирање, но и љубезност. Развивате социјализација, емпатија и моторни вештини.
