Треба ли на бебето да му се дава дополнителна течност, треба ли да го преслечам костимот за капење… Ова се само некои од прашањата кои ги мачат новите мајки и доилки за време на летните месеци.
Ова е прво лето откако сте станале мајка. Не сте се капеле во море или езеро откако сте родиле, не сте користеле ниту крема за сончање, и се прашувате како сето тоа ќе влијае на доењето. Како и во зима, доењето и преку лето е едноставно и природно.
- Смеам ли да се капам ако дојам?
Ако се грижите дали производството на млеко ќе се намали поради температурата на водата на морето или езерото, можете веднаш да престанете. Производството на млеко е условено со количина која бебето ја цица, а не со надворешните температури. Ниту една состојка во морето не може лошо да влијае на доењето. Единствено, може по капењето да ги исплакнете брадавиците од солената вода со обична вода.
- Треба ли да го преслечам горниот дел по капењето?
Мокриот синтетички костим за капење задржува влага околу брадавиците што е погодно тло за развој на сор (габична инфекција) која може да се пренесе и подлабоко во дојката и на устата не бебето.
- Можам ли да користам крема за сончање и самопотемнување?
Кремите за сончање или самопотемнување многу слабо се апсорбираат во крвотокот, па така и во млекото. Затоа, немаат никаква опасност за доењето. Но, треба да се избегнува подрачјето околу брадавиците, за кремата да не дојде во устата на бебето.
- Дали на бебето поради жештините му е потребна дополнителна течност?
Бебе помало од 6 месеци не треба да внесува ништо освен мајчино млеко. За децата кои покрај доењето, јадат и кашички, потребна е дополнителна течност.
