Тинејџер доживеал мозочен удар, таткото предупредува на кои симптоми да внимавате

Поради сопственото трауматично искуство, овој татко сега апелира до сите родители да реагираат навреме уште при првите симптоми за да не го доживеат истото како него.

Иако најчесто се јавува кај повозрасната популација, мозочниот удар не е исклучен ниту кај децата и тинејџерите. Така, 16-годишниот Итан Брус во јуни оваа година доживеа мозочен удар за време на тренинг во теретана. Иако до тој момент бил сосема здрав млад човек, а се занимавал и со спорт, мозочниот удар се појавил ненадејно и му го превртел неговиот живот, но и животот на неговите родители наопаку.

Неговиот татко Че за локалните медиуми изјавил дека бил шокиран кога дознал дека неговиот син доживеал мозочен удар бидејќи бил “совршено здраво момче“ лудо по спорт.

Мозочниот удар е опасна по живот состојба која се јавува кога ќе се прекине снабдувањето со крв во мозокот. Причините за неговото појавување можат да бидат разновидни, а се зависи од тоа каде се случува оштетувањето во мозокот. Што се однесува до Итан, кај него мозочниот удар оставил значително оштетување во форма на нарушување наречено афазија, што резултира со неможност да ги разбере зборовите и јасно да комуницира. Имал проблеми и со краткотрајното губење на меморијата.

Поради сопственото трауматично искуство, овој татко сега апелира до сите родители да реагираат навреме уште при првите симптоми за да не го доживеат истото како него. И лекарите предупредуваат дека сè помлади луѓе го зголемуваат ризикот од мозочен удар поради нездравиот начин на живот. Тие наведуваат дека зголемен ризик имаат младите со прекумерна тежина, пушачите и оние кои често пијат. Останатите ризици главно се поврзани со возраста, па така лицата над 55 години имаат поголема веројатност да добијат мозочен удар.

СИМПТОМИ КОИ НЕ СМЕАТ ДА СЕ ИГНОРИРААТ

Но, на кои симптоми треба да обрнете внимание? Лекарите нагласуваат дека најчестите знаци се опуштеност на едната страна од лицето, чувство на слабост во раката и отежнато зборување.

Нешто поретките симптоми вклучуваат силна главоболка, ненадејна слабост или вкочанетост на едната страна од телото, потешкотии при наоѓање зборови, ненадејно заматување или губење на видот, ненадејна конфузија, вртоглавица или нестабилност, тешкотии да се разбере што зборуваат другите и отежнато голтање. Се се тоа, забележуваат лекарите, знаци при чија појава е потребно веднаш да се реагира и да се побара лекарска помош.