Зошто се појавуваат мозолчиња кај децата

Кај младите деца, во пубертет доаѓа до промена на кожата и се појавуваат акни. Меѓутоа додека кај некои, ретко може да се појават мозолчиња кои се мали и не оставаат лузни, кај други деца, тие акни се значително поголеми, погусти и некогаш се јавуваат по целото лице, гради, раменици и грбот.

Кожата во пубертетот станува погруба. Порите се шират и излачуваат до десет пати повеќе маснотии. Кај некои деца порите се запушуваат со маснотии и мртви клетки на кожата. Клетките на кожата, кои ги навлажнуваат порите природно изумираат и се лупат во редовни интервали, па се заменуваат со нови. Под дејство на андрогените хормони кај одредни млади луѓе тој процес е многу поизразен. Тој чеп од маснотии и мртви клетки на површината добива црна боја, која потекнува од меланинот. Тоа е отворен комедон или митесер, кој самиот се празни и нема воспаление. Микробите кои нормално се наоѓаат во зголемените и запушени пори, предизвикуваат создавање на мозолки, кои секоја за себе претставува минијатурна инфекција. Ист е принципот со настанувањето на подлабоките типови на акни кои се склони да оставаат лузни.

Мозолчињата и акните се јавуваат на брадата, образите, челото, на градите, рамениците и на грбот.

Потоа настануваат црвени точкасти испакнатини, кои се умерено болни. Во средината на тие испакнатини се формираат  гнојаници. Тие може сами да прснат и за ден-два да се исушат. Воспалението може да се прошири на подолните делови на кожата и да се создадат чворови со големина на лешник, кои може меѓусебно да се сливаат. Овие форми на акни често оставаат лузни, кои се можни и кај поблагите форми.

Многу тинејџери ги стискаат мозолчињата и акните, со намера што побрзо да се ослободат од нив, но со тоа само ја влошуваат инфекцијата.

Нови истражувања покажале дека гнојните врвови не се создаваат од недоволна хигиена, и одредени намирници како чоколадо и пржена храна. Тоа нема влијание на оваа состојба на кожата. Мозолчиња се јавуваат како природен дел од пубертетот,  кај речиси сите тинејџери, без оглед на тоа дали имаат мрсна или сува кожа. 

Децата кои страдаат од оваа појава треба да се обратат кај специјалист за кожни болести (дерматолог) и да побараат помош. Не треба да се земаат лекови на своја рака, ниту да се стискаат мозолките и акните.