Триесет и седумгодишната актерка од хит серијата „Вовед во анатомија“, Камила Лудингтон во август го роди своето второ дете, синот Лукас Метју, а во новото интервју во „Шоуто на Кели Кларксон“ се потсети на предизвикувачкото породилно искуство за време на пандемијата на Ковид-19. Како што рече, се чувствува поврзана со многу други мајки кои родиле во волку необични времиња.
„Тоа е поинакво искуство. Морав да раѓам со маска, што отприлика беше најголемото нешто. Значи, носев маска повеќе од 15 часа. Беше интензивно“, раскажа актерката.
Водителката на шоуто призна дека не е сигурна дека би издржала такво породување.
„Клаустрофобично е“, се согласи Лудингтон.
Иако ова не и е прва бременост, таа признава дека ова искуство за неа било многу постресно отколку претходното.
„Не бев загрижена само за можната инфекција со Ковид-19 и што тоа потенцијално би можело да значи за мојата бременост, се грижев и за работи како тоа дека мојот сопруг не можеше да присуствува на породувањето“, рече таа.
Нејзиниот сопруг не можел да биде присутен ниту за време на прегледите, па не можеле да ги споделат ниту тие моменти. Таа исто така признава дека во ниту еден момент „не и паднало на памет“ дека ќе мора да носи маска за време на породувањето.
„Тоа едноставно не беше нешто за што сум размислувала и кога дознав дека ќе морам да носам маска, заплакав. Потполно ја разбрав важноста да се носи маска, но се исплашив. Трудовите се толку физички исцрпувачки што не можев да замислам да им додадам и маска“, раскажа актерката.
Но, на крајот, за време на породувањето толку многу други работи и биле на ум што едноставно поголемиот дел од времето не била свесна дека носи маска, пишува „Пипл“.
