Лилјана Миткова од Кочани е родилката која на 52 годишна возраст пред неколку дена донесе на свет здраво женско бебе во специјалната болница по гинекологија и акушерство „Мајка Тереза“ во Скопје. Сонот на Лилјана се оствари во најжешките јулски денови, донесувајќи лавина на емоции, среќа, радост во кочанското семејство кое долги години се обидувало да дојде до свое потомство.
- Упорноста и издржливоста на Лиле, како што ја викаат пријателите, е инспирација за многу жени кои се обидуваат да се остварат во улогите на мајки, делче од мозаикот кој недостасува
„Ниедна жена во поодминати години која сака да биде мајка не треба да се откажува, туку само да има добра мисла и да не отстапува од зацртаната цел“, порачува родилката Лилјана Миткова.
На радоста и нема крај, честитки пристигнуваат секојдневно, се радува секој што слушнал или ја прочитал оваа несекојдневна вест. Меѓу првите со честитки и градоначалникот на општина Кочани, Николчо Илијев, кој на веб-страницата на Општината прв ги објави фотографиите од родилката и бебето.
Честитки за лекарскиот тим, честитки за упорноста и издржливоста на мајката-хероиња, честитки за долгоочекувана радост во семејството Миткови – нека е здраво и живо девојчето, нека расте опколено со љубов во радост и среќа!
„Ви честитам за храброста и упорноста и сакам да истакнам дека овој случај предизвикува општа радост. Затоа сакаме да испратиме силна порака дека упорноста носи успех и дека секоја жена која сака да биде мајка треба да биде упорна и резултатите ќе дојдат. Исто така ова е потврда дека медицината забрзано оди напред и со голема желба и со поддршка на нашите стручњаци, резултатите ќе дојдат“, рече градоначалникот на Кочани, кој ја посети родилката во болницата во Скопје.
При посетата Лилјана се заблагодарила за вниманието и поддршката. „Истакна дека таа и бебето се чувствуваат добро и повика ниедна жена во поодминати години која сака да биде мајка не треба да се откажува, туку само да има добра мисла и да не отстапува од зацртаната цел. Лилјана се заблагодари на професионалниот ангажман и пред сѐ на човечкиот приод на целиот тим од болницата „Мајка Тереза“ во Скопје“, информираат од општината.
Како што објавија дел од медиумите, целата ин витро постапка ја водел д-р Зоран Илиевски. Честитки за лекарскиот тим, честитки за упорноста и издржливоста на мајката-хероиња, честитки за долгоочекувана радост во семејството Миткови – нека е здраво и живо девојчето, нека расте опколено со љубов во радост и среќа!
