Синдромот ги погодува помладите од 19 години, кои биле комплетно здрави пред да бидат заразени со вирусот SARS-CoV-2. Ретко може да се појави кај луѓе постари од 19 години, а најстариот пациент во Хрватска со овој синдром има 22 години
Лекарите, оваа пролет, за прв пат кај децата и адолесцентите, како последица на инфекцијата со коронавирус, почнаа да го забележуваат таканаречениот мултисистемски воспалителен синдром (MIS-C), кој може да нападне кој било дел од организмот. Досега се пријавени десетина вакви случаи, пишува хрватски „24сата“.
Како што објаснува проф. д-р Горан Тешовиќ, раководител на Одделот за инфективни болести кај децата на Клиниката за инфективни болести „Д-р Фран Михаљевиќ“ во Загреб, овој синдром ги погодува помладите од 19 години, кои биле комплетно здрави пред да бидат заразени со вирусот SARS-CoV-2. Ретко може да се појави кај луѓе постари од 19 години, а најстариот пациент во Хрватска со овој синдром има 22 години.
Овие случаи се доказ дека не постои гаранција дека COVID-19 не може да предизвика сериозни проблеми и компликации кај децата и адолесцентите. Бидејќи многумина сè уште погрешно веруваат дека COVID-19 е болест која е опасна само за постарите лица
„Синдромот за кој зборуваме е со имунолошко посредство и се јавува неколку дена или недели по инфекцијата со вирусот SARS-CoV-2. Варира од многу лесна клиничка слика до тешка, што може да предизвика пад на крвниот притисок и шок. Може да влијае врз кој било органски систем во телото, белите дробови, бубрезите, црниот дроб, васкуларниот или централниот нервен систем, да предизвика проблеми со згрутчување“, вели проф. д-р Тешовиќ, додавајќи дека овој синдром трае неколку дена и може да биде потенцијално смртоносен ако не се препознае навреме.
Иако има одредени разлики, тој е сличен на претходно познатиот Кавасаки синдром, болест која е карактеристична за децата и се манифестира со осип, треска, зголемени лимфни јазли и понекогаш воспаление на срцето и зглобовите. Но, мултисистемскиот воспалителен синдром предизвикан од COVID е сè уште нешто ново, што лекарите го забележаа само пред неколку месеци, кога започна епидемијата. Затоа, вели проф. д-р Тешовиќ, не е можно да се дадат сигурни прогнози за тоа дали остава трајни последици.
Се лекува со имуномодуларна терапија (на пример, имуноглобулини и кортикостероиди), а проф. д-р Тешовиќ истакнува дека и понатаму ги следат пациентите кои кои имале мултисистемски воспалителен синдром и дека сите се засега добро. Овие случаи се секако доказ дека не постои гаранција дека COVID-19 не може да предизвика сериозни проблеми и компликации кај децата и адолесцентите. Бидејќи многумина, имено, сè уште погрешно веруваат дека COVID-19 е болест која е опасна само за постарите лица. (24сата)
ПРОЧИТАЈТЕ И…
