ДЕТЕТО СЕ БУДИ И ПЛАЧЕ БИДЕЈЌИ МУ НИКНУВААТ ЗАБИ: Обидете се со овие трикови за да си ја олесните ноќта и на себе и на детето

На дете на кое му излегуваат заби обично навечер се буди со плачење, а еве како сепак можете малку да му ја олесните болката и непријатноста.

Излегувањето на првите заби кај бебињата е непријатно и болно, а во текот на ноќта оваа тегоба се чини дека е уште поинтензивна. Детето одеднаш ќе почне да плаче во текот на ноќта, ќе се разбуди и тешко ќе се утеши.

Важно е да можете да ја препознаете оваа фаза во развојот, а еве ги симптомите на никнувањето на првите заби.

  • Црвени и чувствителни непца
  • Отечени непца
  • Црвени образи
  • Поинтензивно лигавење
  • Детето става во уста се што ќе му дојде до рака и го гризе
  • Почесто ги става рачињата во уста од вообичаено
  • Нервозно е
  • Понекогаш може да има благо зголемена телесна температура

Симптомите на никнување на забите се поизразени кога излегува првиот заб, но и кога катниците избиваат бидејќи се многу поголеми од предните заби.

Како да ја “преживеете“ ноќта?

Иако не е секогаш лесно, држете се до редовните рутини пред спиење. Ако ги промените правилата, дури и на кратко, вашето дете може да има проблеми да се врати во режимот на спиење.

Кога детето ќе се разбуди, дајте му неколку минути да видите дали повторно ќе заспие само од себе. Ако само не успее да се смири, погалете го и утешете го, но поттикнете го да остане во кревет и да се обиде повторно да спие.

Ако детето не успее да заспие, еве што можете да направите:

  • понудете му ладна вода
  • масирајте му ги непцата со чист прст
  • дајте му разладена (не замрзната) грицка за заби

Имајте предвид дека геловите за заби не се препорачуваат бидејќи некои може да содржат состојки кои не се погодни за бебиња и мали деца. Доколку сепак сакате гел, консултирајте се со вашиот педијатар.

Ако ништо друго не помага, на детето можете да му дадете доза парацетамол за бебиња. Никогаш не давајте некои други лекови без претходна консултација со лекар.