По години напредок, девојчињата повторно заостануваат зад момчињата во математиката, открива истражување на УНЕСКО, чии резултати беа објавени во четврток.
Уделот на земји во кои момчињата ги надминуваат девојчињата достигнал во 2023 година ниво невидено во речиси три децении, истакнува УНЕСКО.
„Овој тренд е загрижувачки“, предупредува организацијата на Обединетите нации, според која силните математички вештини се клучни „за поттикнување на економскиот и општествениот развој, промовирање на иновации и пронаоѓање решенија за итните глобални проблеми“.
Анализата, изработена во соработка со Меѓународното здружение за вреднување на образовните постигнувања (IEA), се темели на податоци од TIMSS (меѓународно истражување за трендовите во знаењето по математика и природни науки) собрани помеѓу 1995 и 2023 година во 47 земји и територии на крајот од пониските одделенија во основното образование, како и во 38 земји во повисоките одделенија, вклучувајќи ги Шпанија, Кина, Австралија и Соединетите Американски Држави.
Иако девојчињата историски покажувале послаби резултати од момчињата по математика, овој јаз значително се намалил во текот на 2000-тите и 2010-тите години, истакнуваат авторите.
Сепак, од 2019 година динамиката се променила. Во 2023 година, момчињата ги надминуваат девојчињата на крајот од пониските одделенија во основното образование во 81 отсто од анализираните земји, во споредба со 52 отсто во 2019 година, 39 отсто во 2015 година, 41 отсто во 2011 година и 26 отсто во 2003 година.
Разликите се одразуваат и во распределбата на нивото на вештини. Во 2023 година, 21 отсто од земјите имале поголем удел на девојчиња кои не го достигнале минималниот меѓународен праг по математика на крајот од пониските одделенија, во споредба со 4 отсто во 2019 година и 2 отсто во 2015 година. Во исто време, од 2007 година, уделот на земји во кои момчињата имаат исклучително ниско ниво на знаење постојано се намалувал, до степен што во 2023 година речиси исчезнал (2 отсто).
Во повисоките одделенија на основното образование, ситуацијата изгледа понуансирана, но трендот останува загрижувачки. Иако уделот на земји во кои момчињата ги надминуваат девојчињата е помал отколку во пониските одделенија, на долг рок значително расте.
УНЕСКО и IEA ова назадување делумно го припишуваат на долготрајните последици од пандемијата на коронавирусот, бидејќи продолженото затворање на училиштата го зголемило заостанувањето во учењето по математика и ја нарушило самодовербата и ангажираноста кај девојчињата.
За да се запре оваа динамика, двете организации повикуваат на дејствување уште од пониските одделенија во основното образование, преку јакнење на самодовербата на девојчињата во математиката со забавни активности, едукација на наставниците за родова пристрасност со цел борба против стереотипите и обезбедување системско следење на резултатите според пол.
