Децата не треба да добијат паметен телефон пред да наполнат 13 години, покажува нова студија. Иако оваа возраст се смета за поповолна за менталното здравје, таа сепак носи одредени ризици, открива истражувањето спроведено од Детската болница во Филаделфија.
„Се чини дека 13-годишната возраст е побезбедна“, изјавил Ран Барзилај, детски и адолесцентен психијатар во болницата. „Но и тогаш е важно да се постават одредени ограничувања за времето што детето го поминува пред екран“, додал тој.
Ризици поврзани со возраста
Еден од ризиците од давање паметен телефон на дете на 13-годишна возраст е нарушениот сон. Сепак, истражувачите утврдиле дека тоа не било поврзано со депресија или дебелина. Овие резултати се надоврзуваат на долгогодишните препораки до родителите да го одложат купувањето паметен телефон сè до тинејџерските години.
Претходна студија на истиот истражувачки тим покажала дека кај 12-годишниците кои добиле паметен телефон постои поголема веројатност за нарушен сон, депресија и дебелина. Истражувачите забележале дека ризикот се зголемувал повеќе од двојно кај децата кои поминувале повеќе од пет часа дневно на телефон, во споредба со оние кои го користеле два часа или помалку.
Што покажало истражувањето?
Студијата не анализирала кои конкретни активности на телефонот – како играње видеоигри или користење социјални мрежи – би можеле да бидат најштетни за здравјето на децата.
Истражувачите го следеле здравјето на речиси 2.000 тинејџери кои учествувале во студијата ABCD, најголемото долгорочно американско истражување за развојот на мозокот и здравјето на децата. Од вкупно 1.959 испитаници, 1.230 добиле паметен телефон на возраст меѓу 13 и 14 години.
Самите деца пријавувале колку време дневно поминувале користејќи паметни телефони.
Препораки за родителите
Претходни истражувања покажале дека повеќе од половина од американските тинејџери губат сон поради користење паметни телефони. Сонот е клучен за целокупното здравје и за развојот на мозокот, а според официјалните препораки, на тинејџерите им се потребни од 8 до 10 часа сон секоја ноќ.
Сепак, Барзилај истакнува дека овој тренд може да се промени.
Држењето на паметниот телефон надвор од детската спална соба во текот на ноќта и ограничувањето на неговата употреба може да ги заштити децата од негативни здравствени последици. Децата кои ги оставале своите уреди надвор од собата навечер поретко пријавувале дека не спијат доволно.
„Кога резултатите од ова истражување ќе се разгледаат заедно со нашите претходни анализи, можеме со претпазливост да кажеме дека добивањето паметен телефон на 13-годишна возраст изгледа побезбедно отколку на 12 години или порано. Сепак, дури и на 13 години, нашите наоди покажуваат дека е важно паметниот телефон да се воведе со јасни правила и соодветен родителски надзор“, изјави Барзилај.
„Ги охрабруваме семејствата да постават дневни ограничувања за користење на паметните телефони и да ги држат надвор од детските спални соби во текот на ноќта“, заклучил тој.
