Многу пациенти оваа зима се жалат на долготрајна кашлица, а лекарите објаснуваат дека тоа би можело да биде затоа што луѓето едноставно фаќаат една инфекција по друга.
Професорката Камила Хоторн, шефица на катедрата за семејна медицина на Кралскиот колеџ, рече дека матичните лекари оваа зима забележале дека респираторните инфекции траат подолго оваа година, а пациентите потешко се опоравуваат, но додаде дека повеќето закрепнале без никакви последици или потреба од медицинска интервенција.
Ако кашлицата трае подолго, се влошува со отежнато дишење или ако почувствувате болка во градите или губење на тежина во краток временски период, побарајте лекарска помош
Таа истакнува дека карантините за време на пандемијата можеби ја намалиле отпорноста на јавноста на инфекции, но признава дека не е сосема јасно зошто кашлицата и настинката се задржуваат толку долго и зошто на луѓето им треба толку долго време за да се опорават.
Истражувањата покажуваат дека стапките на инфекции на респираторниот тракт се далеку над просекот, што е потврдено и од неделните податоци на Британската здравствена агенција за грип и други болести. Овој месец, возрасните кои не мора нужно да излегуваат, беа предупредени да останат дома за да се намали ширењето на инфекциите.
„Не е сосема јасно зошто некои инфекции траат подолго од вообичаеното. Тоа го забележале и лекарите и пациентите. Поголемиот дел од јавноста беше изолирана во последните две зими и тоа очигледно ја намали отпорноста на инфекции. Затоа, во некои случаи, луѓето еднаш се заразуваат со една инфекција, а веднаш потоа и со друга. А бидејќи се работи за различни инфекции, преболувањето на едната не значи имунитет на другата“, рече Хоторн.
Антибиотиците немаат ефект на вирусните инфекции, туку само на бактериските инфекции, а повеќето инфекции на респираторниот тракт се вирусни
Вели дека на пациентите им се советува да излегуваат помалку во текот на зимата и генерално да внимаваат на хигиената, пишува „Sky News“.
Хоторн го препорачува вообичаениот парацетамол за симнување на висока температура, болки во грлото или увото, да внимавате да не ви е ладно, да се одморате доволно и да пиете доволно течности.
Таа уште еднаш нагласува дека антибиотиците немаат ефект на вирусните инфекции, туку само на бактериските инфекции, а повеќето инфекции на респираторниот тракт се вирусни.
Затоа, ако кашлицата трае подолго, се влошува со отежнато дишење или ако почувствувате болка во градите или губење на тежина во краток временски период, побарајте лекарска помош.
