Индуцираното породување е предизвикување на контракции на матката со различни опстетрички техники и лекови, како бременоста би се завршила со природно породување. Најдобро сценарио на породување е кога тоа ќе почне спонтано, но постојат и ситуации во кои породувањето мора и треба да се предизвика, испровоцира односно да се индуцира. Најчесто породувањето се индуцира кога лекарите ќе проценат дека довршувањето на бременоста е во интерес на трудницата и детето и/или е подобро решение од продолжување на бременоста.
Причините за индукција на породување се различни:
- Преносеност, т.е. траење на бременоста над 41 недела
- Интраутерин застој на растот на плодот
- Ултразвучно и клинички поголемо зрело дете
- Хронична или акутна болест на мајката, како висок притисок, болест на бубрезите
- Патологија на бременоста, на пример, прееклампсија, недоволно плодова вода
- Гестациски дијабетес
- Предвремено прскање на водењакот е всушност стимулирано породување. Породувањето започнало со прскање на водењакот, но нема трудови. По одредено време ( 24 часа), на трудницата на која и тече плодова вода и детето е зрело, треба да се породи поради можност од инфекции кај детето.
