Главниот американски лекар Вивек Мурти оцени дека децата помлади од 13 години се премлади за социјални мрежи бидејќи сè уште го „развиваат својот идентитет“.
Мета, Твитер и мноштво други гиганти помеѓу социјалните мрежи им дозволуваат на 13-годишниците да се приклучат на нивните платформи.
“Јас, лично, врз основа на податоците што ги видов, верувам дека 13 години е прерано… Тоа е возраст за која е навистина важно да размислиме како тие размислуваат за сопствената вредност и за нивните односи. А често искривеното опкружување на социјалните медиуми им прави лоша услуга на многу од овие деца“, вели Мурти.
Бројот на тинејџери на социјалните мрежи предизвика тревога кај медицинските експерти, кои укажуваат на се поголем број истражувања за штетата што таквите платформи можат да ја предизвикаат кај адолесцентите.
Првиот човек на американското јавно здравство, Мурти, ги призна потешкотиите во оневозможувањето на децата да ги користат овие платформи со оглед на нивната популарност, но сугерира дека родителите можат да успеат со претставување обединет фронт.
“Ако родителите можат да се соберат и да кажат дека, обединети, нема да им дозволиме на нашите деца да користат социјални медиуми додека не наполнат 16, 17 или 18 години или која било возраст што ќе ја изберат, тоа е многу поефикасна стратегија за да се осигураме дека децата не се рано изложен на штета“, изјави тој.
Ново истражување сугерира дека сурфањето на социјалните мрежи може да ја промени хемијата на мозокот кај адолесцентите.
Според студијата објавена овој месец во списанието JAMA Pediatrics, учениците кои поредовно прегледувале социјални мрежи покажале поголема нервна чувствителност во одредени делови од нивниот мозок, поради што нивните мозоци со текот на времето повеќе реагирале на социјалните последици.
Психијатри како д-р Адриана Стејси со години укажуваат на таа појава. Стејси, која првенствено работи со тинејџери и ученици, вели дека користењето на социјалните мрежи предизвикува „исфрлање на допамин“ во мозокот.
“Кога правиме работи кои предизвикуваат зависност, како користење на наркотици или паметни телефони, нашиот мозок ослободува многу допамин одеднаш. Тоа му кажува на нашиот мозок да продолжи да го користи“, вели таа. “Особено кај тинејџерите, тој дел од мозокот е всушност хиперактивен во споредба со возрасните. Тие не можат да се мотивираат себеси да прават ништо друго“.
