Сите во принцип знаеме дека телефоните и екраните имаат лошо влијание врз децата, но како навистина да не го сфаќаме тоа. Кога ќе видите какво влијание имаат екраните врз мозокот на детето, ќе размислите двапати пред безгрижно да го оставите вашето дете со телефон во рацете.
Научниците предупредија дека тинејџерите имаат двојно поголема веројатност да станат зависни од екраните бидејќи нивниот мозок сè уште се развива на таа возраст, а прекумерната изложеност на екрани целосно го менува нивниот мозок.
Во овој период од нивниот живот, префронталниот кортекс, кој во суштина е „контролен систем“ на мозокот, сè уште се развива и станува многу зависен од моменталното задоволство што младите го добиваат од лизгањето низ социјалните мрежи.
Во емисија на една британска телевизија, експертите анализирале слики со магнетна резонанца кои покажале како мозокот на тинејџерите реагира на пријатни искуства како што се лизгање низ социјалните мрежи како ТикТок или Инстаграм.
Професорката по невронаука и ментално здравје Сиара Мекејб објаснила дека возрасните со целосно развиен мозок знаат кога е „доволно“, додека децата и младите не размислуваат на тој начин.
Како резултат на тоа, тинејџерите се повеќе склони кон зависност бидејќи се навикнати да ја добиваат таа редовна стимулација што доаѓа од онлајн содржините. Наместо да ги искусат радостите на реалниот живот, ним им е потребно брзо подигање на допамин, што се јавува при изложување на екран.
„Возрасните, исто така, го активираат системот за наградување на нивниот мозок кога гледаат во нивниот телефон, но тие имаат развиен префронтален кортекс, т.е. „контролен систем“ на мозокот. Постојат докази кои укажуваат на тоа дека мозокот на адолесцентните различно реагира од мозокот на возрасните, особено на искуствата што го активираат системот за наградување. Ова е веројатно затоа што делови на префронталниот кортекс се уште не се во целост развиени кај младите луѓе“, објаснува д-р Мекејб.
Таа додава и дека тинејџерите се изложени на поголем ризик да станат зависни од социјалните мрежи и екраните бидејќи нивниот мозок се навикнува на постојаното ослободување на допамин што се случува кога тие лизгаат содржини по нивните телефони.
