Родителството е најголем предизвик во кој, како што тврдат и психолозите, но и оние кои ги воспитуваат децата, грешките се неминовни. Меѓутоа, важно е како родители и воспитувачи да се обидеме да увидиме каде грешиме и да избегнуваме ситуации кои на развојот на детската психа оставаат последици како што се недоволно самопочитување и самодоверба, стравови што ќе ги следат цел живот.
Некои грешки во воспитувањето многу ги чинат децата и во возрасниот период, а психолозите тврдат дека постојатг пет погрешни однесувања на родителите со кои можеби на децата можат да им ја уништат иднината.
- Го сакате детето, но никогаш тоа не му го кажувате
Многу родители, колку и да се посветени и да ги сакаат своите деца често прават грешка и на децата не им покажуваат и не им кажуваат дека ги сакаат и колку им значат. Ретко ќе ги пофалат, а уште помалку отворени ќе зборуваат за емоциите. На нашите простори тоа е помалку и работа на култура и наследство, бидејќи се верувало дека “децата се расипуваат, ако се пофалат“.
Меѓутоа, воспитувањето треба да биде прилагодено на времето во кое живееме, па пожелно е на децата да им се покажува љубов и низ вербализација.
Не се колебајте да му кажете на детето колку го сакате и колку ви значи неговото постоење.
- Претерувате во контролирањето на одлуките и изборите на детето
Во повеќето случаи, родителите имаат потреба да ги контролираат децата во речиси сè што прават, особено во одлуките што ги носат.
Понекогаш е потребно да им се дозволи на децата сами да донесат некои важни одлуки. Контролирањето на секоја ситница во нивниот живот ќе доведе до тоа да се сомневаат во себе и да се чувствуваат ограничени. Давањето можност на децата да одлучуваат, ќе ја развие нивната самодоверба и самопочит и ќе ги научи да преземат одговорност за своите постапки.
- Не ја почитувате приватноста на детето
Како и на возрасните, на децата им е потребна приватност. Растејќи, таа потреба се зголемува, бидејќи тоа всушност значи и дека тие сакаат да преземат контролата врз сопствениот живот.
Дајте им шанса, а од далеку следете ги и гледајте што и како прават. Доколку не ја почитувате нивната приватност, го ставате детето во ситуација на недоверба, а лажењето може да стане навика од која нема да се ослободи ниту како возрасно лице.
Се расправате со партнерот пред децата
Не се расправајте пред децата, особено ако тие кавги се непријатни, полни со грди зборови и вербално агресивни. Тоа може да остави долготрајни трауми врз нив, а поради тоа, подоцна може да имаат проблеми и во нивните емотивни односи.
Родителите треба да бидат пример за љубов, доверба и лојалност, врз основа на кои децата ќе формираат односи.
- Имате нереални очекувања
Има родители кои имаат големи очекувања од своите деца, без разлика дали се работи за училиште, спортски успех или нешто друго. Понекогаш, како некој што воспитува деца, не сме свесни дека секое дете дава се од себе за да ги исполни очекувањата на родителите.
Имајте на ум дека секое дете е различно и посебно и дека секое од нив има различни способности. Набљудувајте го и следете го вашето дете и не очекувајте го невозможното од него, бидејќи тоа може да го направи несигурно и да му даде чувство на инфериорност со кое ќе мора да се справи и како возрасно лице.
