Мамо, досадно ми е!
- Колку често во последно време ја слушате оваа реченица? Веруваме – пречесто.
Сите сте заедно во домот и целосно е оправдано што ви снемува идеи како да ги анимирате децата, но и целото семејство. Со интересни идеи, деновите во домот може да станат најубаво уживање и најголема радост.
За да пронајдете инспирација, погледнете какви се забавни игри може да реализирате во рамките на вашите четири ѕида.
Вечер за маскенбал – Годинава нема маскенбал по училиштата и градинките, и време е да направите маскирање во домот. Сега е вистинско време децата да почнат со реализација на идејата што сакаат да се маскираат. Забавата закажете ја за први април, но може да направите и тематска вечер било кој друг ден.
Пикник во домот – Ќебе на подот, корпа со храна, музика од природа, свеќички, прегратки.. Има ли нешто поубаво?
Патување низ домот – Одберете земја, истражете го нејзиниот јазик, обичаи, навики. Гледајте филмови, направете нивен специјалитет и уживајте во патувањето по дома. Ова истражување и учење за другите народи, особено е забавно за поголемите деца.
Садете цвеќе – Научете ги децата како се сади цвеќе и уживајте во следењето како растат билките кои заедно сте ги посадиле.
Друштвени игри – Со нив никогаш не е здодевно и ги обожава секоја генерација. Загарантирано е смеење.
Ваша емисија за готвење – Играјте се кувари, ставете капи, подгответе состојки и гответе. Децата ќе уживаат во подготовката, а потоа и во дегустацијата на сопствените специјалитети.
Караоке – Една вечер резервирајте за пеење. Заедничката журка со многу смеење и радост е сигурна.
