Дали е во ред родителот да го бакнува своето дете во уста? Ова е прашање околу кое родителите често имаат поделени мислења. За едни тоа е нормален и невин израз на љубов и блискост, а за други – нешто што им создава непријатност.
На крајот, одлуката е лична и не постои едно правило што важи за сите семејства.
Важно е да се има предвид дека децата ваквите гестови не ги доживуваат на ист начин како возрасните. За нив, бакнежот најчесто е само знак на нежност, сигурност и поврзаност.
Родителите имаат различни ставови
Авторката на текстот споделила сопствено искуство со својата тригодишна ќерка.
„Кога е расположена, бара ‘бакнеж од вистинска љубов’. Тоа првпат го слушна додека заедно го гледавме ‘Шрек’, а потоа стана нејзин начин да покаже дека сака нежност“, напишала таа.
Таа додава дека никогаш не помислила дека таквиот момент би можел да се сфати поинаку, сè додека не налетала на интернет-дискусија што ја натерала да размисли.
Интернет-дебата што ги подели родителите
Темата се отворила и на социјалните мрежи, кога една мајка споделила дека пријателка ѝ рекла дека ѝ е „чудно“ што ја бакнува својата деветмесечна бебе во уста.
Таа затоа ги прашала другите родители: „Дали вие ги бакнувате своите деца во уста?“
Коментарите покажале колку се различни ставовите.
Некои родители објасниле дека децата самите инсистираат на такви бакнежи.
„Мојот двегодишен син сака мене и татко му да нè бакнува во уста. Ако се обидеме да ја свртиме главата, тој со рацете нè враќа за да нè бакне токму таму“, напишал еден родител.
За некои родители тоа е непријатно – и тоа е во ред
Други родители објасниле дека имаат лични причини поради кои не се чувствуваат удобно со таков вид блискост.
Една мајка споделила дека преживеала злоупотреба во детството и затоа избегнува бакнежи во уста, но своите деца ги бакнува во чело, коса и образи.
„Не ми е чудно кога другите го прават тоа, едноставно јас лично не се чувствувам удобно“, напишала таа.
Децата не го доживуваат тоа како возрасните
Многу родители во дискусијата се согласиле дека малите деца не поврзуваат ваков бакнеж со ништо сексуално и дека возрасните не треба да им наметнуваат такви значења на невините детски гестови.
„Проблемот е кога возрасните го сексуализираат тоа“, напишал еден корисник.
Важни се и културолошките разлики
Во некои култури бакнувањето членови на семејството во уста е сосема вообичаено.
Еден корисник од Турција објаснил дека во неговото семејство тоа е „платонски израз на наклонетост“ и дека така се поздравувале уште генерациите на неговите баби и дедовци.
Нема „точен“ одговор
На крајот, експертите и родителите се согласуваат во едно: секое семејство има право само да одлучи што му е прифатливо и удобно.
Најважно е детето да расте во средина исполнета со љубов, сигурност, почитување на границите и чувство на блискост.
