Луѓето и понатаму ќе мора да носат маски, да практикуваат добра хигиена и меѓусебна оддалеченост како би се контролирало ширењето на вирусот
♦♦♦♦♦♦♦
За да се држи ширењето на коронавирусот под контрола, луѓето ќе мора да живеат под рестриктивни мерки уште две или повеќе години, смета Матијас Егер, научникот кој го води швајцарскиот кризен штаб за борба против вирусот.
Eпидемиолог и експерт за јавно здравје во разговор за „NZZ am Sonntag“, рекол дека се надева дека широко распространетата вакцинација ќе започне за една година, но предупредил дека сè уште има многу пречки.
„Засега слабо го познаваме вирусот. Можно е да откриеме непријатни квалитети кои ќе го искомплицираат и забават развојот на ефективни и безбедни вакцини“, додал тој.
Егер предупредил дека луѓето и понатаму ќе мора да носат маски, да практикуваат добра хигиена и меѓусебна оддалеченост како би се контролирало ширењето на вирусот.
Во пресрет на отворањето на швајцарските основни училишта на 11 мај, Егер им порачал на родителите дека не треба да се грижат затоа што не постојат прецизно документирани случаи во кои децата ги заразиле возрасните, а скоро и да нема случаи на заразување меѓу децата.
„Во светот постојат 3 милиони случаи на Ковид-19. Податоците покажуваат дека децата не играат голема улога во ширењето на вирусот“, додал Егер, притоа не отфрлајќи дека заразата од деца е можна, па ги замолил родителите, сепак, да бидат внимателни, пренесува „Хина“.
