Луѓето кои имаат две деца имаат поголема веројатност да доживеат 76 години, покажува нова студија. Истражувачите од Универзитетот во Мичиген прегледале генетски и здравствени информации на 276.000 луѓе кои живеат во Велика Британија. Тие утврдиле деа раѓањето деца е поврзано со подолг живот.
„Релативно е јасно дека да се има деца е покорисно за долговечноста отколку да се немаат деца воопшто. Ја меревме веројатноста на живот до 76 години. Оние со деца имале пет до десет процентни поени предност во однос на оние без деца“, објаснува еден од авторите на студијата, професор Џианчи Џанг.
Професорот Џанг вели дека е идеално да се има две деца.
„Две деца одговараат на најдолгиот животен век. Имањето помалку или повеќе деца го намалува животниот век“, истакнал тој.
Претходни студии покажале дека луѓето со деца имаат повеќе социјални интеракции, како што се интеракции со други родители и наставници, а познато е дека поголемиот социјален контакт е поврзан со подолг живот.
„Можно е родителите на две деца да постигнат добар баланс помеѓу добрата количина на социјална интеракција и не премногу економски или физички товар“, додал Џанг.
Овие наоди беа објавени во списанието Science Advances.
