Научници развија нослив ултразвучен фластер кој во иднина би можел да помогне во порано откривање на компликации во бременоста и да овозможи континуирано следење на бебето во матката, дури и надвор од болница.
Станува збор за уред наречен UPatch – вид ултразвучен фластер кој се поставува на стомакот на трудницата и може со часови да ги следи отчукувањата на срцето на бебето, протокот на крв и движењата на фетусот во реално време.
Денешните методи за следење на бременоста имаат одредени ограничувања, посочуваат истражувачите. Класичните ултразвучни прегледи даваат само краток „пресек“ на состојбата, додека континуираното следење на срцевите отчукувања на бебето често доведува до голем број лажни аларми.
„Сегашните дијагностички уреди нудат само краток увид во тоа што се случува со бебето“, изјавил професорот Шенг Џу од Стенфорд Универзитетот, еден од авторите на истражувањето.
„Пациентките вакви мерења можат да прават само во болница, па меѓу прегледите се губат многу важни податоци“, додал тој.
Фластерот може да го следи бебето со часови
За разлика од класичните ултразвучни прегледи, овој уред овозможува континуирано следење на бебето во текот на повеќе часови, додека трудницата ги извршува секојдневните активности.
„На тој начин не се пропуштаат податоци и можно е да се следат промените и обрасците карактеристични за секоја трудница“, објаснил професорот Шенг Ксу.
Истражувачите наведуваат дека уредот може да го следи и протокот на крв во папочната врвца, дури и кога бебето се движи во матката, што досега претставувало голем предизвик.
Студијата, објавена во Nature Biotechnology, опишува како научниците развиле специјални алгоритми и електронски компоненти кои помагаат сигналот да остане стабилен дури и кога фетусот се движи.
„Ова е многу важен чекор што покажува колку ваквата технологија е навистина изводлива“, изјавила д-р Антонија Георгиева од Универзитетот Оксфорд.
Во еден случај уредот помогнал да се спречи мртвороденче
UPatch бил тестиран кај трудници во Велика Британија и САД.
Во еден дел од истражувањето учествувале 62 трудници, а резултатите од уредот биле споредени со класичните ултразвучни прегледи.
„Резултатите покажаа многу големо совпаѓање помеѓу носливиот фластер и стандардниот ултразвук“, изјавил Том Парк, главен автор на истражувањето.
Во вториот дел од истражувањето, уредот континуирано ги следел срцевите отчукувања и протокот на крв кај 52 трудници, а во еден случај им помогнал на лекарите да забележат сериозен проблем.
„Кај трудница со прееклампсија, UPatch открил сериозно забавување на растот на бебето во матката, што довело до итен царски рез за да се спречи мртвороденче“, навеле истражувачите.
Иако уредот засега сè уште е во фаза на развој и е поврзан со надворешна опрема, научниците веќе работат на безжична верзија.
„Нашата долгорочна визија е нослив ултразвучен систем што трудниците ќе можат да го користат во текот на секојдневниот живот, дома и при вообичаените активности“, изјавил Парк.
Истражувачите веруваат дека ваквата технологија би можела особено да им помогне на трудниците во подрачја каде пристапот до здравствена заштита е ограничен.
Д-р Георгиева истакнала дека потенцијалот на ваквите уреди би можел да биде огромен.
„Можноста за спречување мртвороденост би можела да биде исклучително голема“, рекла таа.
Таа додава дека континуираното собирање податоци би можело да им помогне на научниците подобро да разберат зошто некои бремености поминуваат уредно, а други развиваат сериозни компликации.
