Грција, со помош на УНИЦЕФ и финансирање од Европската Унија, стана пример за успешна борба против дебелината кај децата во Европа.
Резултатите од Националната програма за превенција на дебелината кај децата покажале значителен напредок во прехранбените навики и физичката активност на децата и нивните семејства.
Програмата, која ја спроведе грчкото Министерство за здравство во соработка со УНИЦЕФ, ја опфати целата земја, а Светската здравствена организација (СЗО) ја прогласи Грција за „земја модел“ за Јужна Европа.
Повеќе од 1.900 деца со прекумерна телесна тежина или дебелина добиле бесплатно нутриционистичко советување преку 13.000 индивидуални третмани.
Намалена и потребата од лекови
Осум од десет деца го изгубиле вишокот килограми и го вратиле нормалниот индекс на телесна маса, додека многу деца со дијабетес, хипертензија или покачен холестерол ја подобриле здравствената состојба и ја намалиле потребата од лекови, пишува Euronews.
Грција од земја со една од највисоките стапки на детска дебелина во Европа стана пример за успешна национална стратегија. Клучот е во системскиот пристап – комбинација од индивидуално советување, образовни активности, спорт, инклузивност и активно учество на родителите. Овој модел веќе е препознаен од СЗО и може да послужи како инспирација за други земји во регионот
Програмата ги вклучила и училиштата: речиси 100.000 ученици учествувале во работилници за здрава исхрана, а повеќе од 135.000 деца во бесплатни спортски активности. Уделот на деца вклучени во организиран спорт пораснал од 52,5 на 60 проценти.
73 проценти од родителите вклучени во програмата
Биле поделени и повеќе од 130.000 здрави оброци и свежо овошје во основните училишта, а посебни едукативни материјали биле прилагодени за децата со попреченост и посебни потреби.
Значително пораснала и свеста на родителите за здравата исхрана и физичката активност на децата. Повеќе од 73 проценти од родителите навеле дека биле вклучени во програмата или дека користеле некоја од понудените услуги.
Експертите проценуваат дека, доколку продолжи спроведувањето на ваквите мерки, стапката на дебелина кај децата во Грција би можела да продолжи да опаѓа сè до 2040 година.
