Новите истражувања покажуваат дека поради новите варијанти на Ковид-19, бројот на случаи во САД би можел да се зголеми. Следниот бран на инфекции најверојатно ќе дојде од поновите подваријанти на Omicron BA.4 и BA.5, два тесно поврзани вируси кои првпат беа идентификувани во Јужна Африка, а во САД дојдоа кон крајот на март, според GISAID.
Неодамнешните истражувања сугерираат дека овие варијанти го избегнуваат имунитетот создаден од вакцините и минатите инфекции, пишува Си-Ен-Ен.
Според најновите ажурирања на Американскиот центар за контрола и превенција на болести и геномската компанија Helix, BA.4 и BA.5 заедно сочинуваат околу шест до седум отсто од новите инфекции во САД кон крајот на мај.
Неодамнешните истражувања сугерираат дека подваријанти на Omicron BA.4 и BA.5 го избегнуваат имунитетот создаден од вакцините и минатите инфекции
„Ова е сериозна закана“, напиша д-р Дејвид Хо, професор по микробиологија и имунологија на Универзитетот Колумбија во Њујорк. „Пред само месец дена процентот беше 0,02 отсто“.
BA.4 е откриен во најмалку 30 земји, а BA.5 е пронајден во 32 земји, според веб-страницата Outbreak.info што ја одржува Институтот за истражување „Скрипс“.
Хо и неговите колеги неодамна тестираа во лабораторија антитела од крвта на вакцинирани луѓе, како и антитела од луѓе кои прележале Ковид, против конструираните вируси BA.4 и BA.5. Во секој случај, тие констатирале намалување на потенцијата против BA.4 и BA.5.
Тие откриле дека вирусите BA.4 и BA.5 имаат повеќе од четири пати поголема веројатност да ги избегнат антитела кај луѓето кои биле вакцинирани и примиле бустер доза во споредба со BA.2. Тоа значи дека BA.4 и BA.5 имаат поголема веројатност да доведат до продорни инфекции, дури и кај луѓе кои претходно имале Ковид-19.
Без надградени вакцини или бустери, Хо очекува многу Американци да се разболат во наредните недели или месеци. „Мислам дека ќе видиме многу инфекции, но не и нужно потешки форми на болеста или смрт“, рече тој.
