ПЕДИЈАТРИТЕ ГИ МОЛАТ РОДИТЕЛИТЕ: Престанете да ги правите овие работи кога ќе ви се разболи детето

Децата не доаѓаат со упатства за употреба, а тоа особено излегува на виделина кога се болни.

Болеста на детето, дури и обична настинка, за родителите може да биде стресна бидејќи влијае на детското расположение, апетит и општа состојба. Многу родители ги пребаруваат симптомите на своите деца на Интернет, обидувајќи се сами да постават дијагноза и на тој начин да си олеснат, други пак за секоја болест го носат детето на Ургентен, додека некои се прилично ноншалантни кон детските тегоби. Педијатрите за списанието Parents зборуваат што родителите треба веднаш да престанат да прават кога станува збор за болеста на нивното дете.

  • Не гуглајте симптоми

Родителите сакаат да ги пребаруваат на Гугл симптомите на болестите на нивните деца. Стравот е голем, а пребарувањето на Интернет се чини како најбрзиот начин за наоѓање на одговори и смирување. Сепак, гуглајќи родителите ретко се смируваат, а почесто се вознемируваат. Невозможно е да се дијагностицира состојбата на детето на Интернет и лекарите ги советуваат родителите да не се обидуваат да бидат лекари, туку да го доведат детето на преглед кај специјалист.

  • Не одете на ургентно за секоја работа

Освен во исклучителни ситуации, доволно е да се јавите кај лекарот на детето и да се посоветувате. Ако нешто му се случи на вашето дете во неработен ден, контактирајте ја дежурната клиника или Брза помош и побарајте совет. Избегнувајте да одите на Ургентен со детето за секоја температура или посилна кашлица бидејќи веројатно со часови ќе чекате некој да ве прегледа, ќе го изморите и детето и себе, а итната или ургентна помош не е место за справување со секојдневни болести, туку за итни случаи.

  • Не барајте антибиотици за секоја вироза

Има ситуации во кои антибиотиците се оправдани и нужни, но во повеќето случаи на детски болести нема потреба од нив бидејќи се работи за вирусни заболувања. Ако педијатарот не му препише антибиотик на вашето дете, за тоа постои причина. Не трчајте веднаш по второ мислење и не се обидувајте да набавите антибиотици на своја рака. Нивната неправилна употреба може да предизвика голема штета.

  • Не прескокнувајте прегледи

Сите живееме забрзани животи и понекогаш забораваме дека е време за превентивни прегледи кај стоматолог, офталмолог или дерматолог, а истото го правиме и за децата. Доколку детето има одредени тегоби кои лекарите ги третираат, не прескокнувајте ги закажаните прегледи и испитувања. Не чекајте состојбата да стане алармантна, туку реагирајте на првите знаци на влошување.

  • Не се нервирајте премногу поради температурата на детето

Температурата на детето е извор на стрес за многу родители, но кога детето ќе ја надрасне новородената фаза каде температурата може да биде сериозен проблем, нема потреба премногу да се грижите. Температурата е чест симптом кај малите деца, како што е течење на носот, кашлица или болка во грлото, и ако се држи под контрола, генерално нема причина за загриженост.