Пред нас е машка година! Барам ако се суди според првороденото бебе во 2023 година – една минута после полноќ, на 1 јануари, на Универзитетската Клиника за гинекологија и акушерство во Скопје се роди машко бебе, прва рожба на 22-годишната Стојанка Панајотова од село Соколарци, Кочани. Новороденчето е родено со царски рез, тешко е 3720 грама, а долго 51 сантиметар.
Во текот на вчерашниот ден мајката и бебето на ГАК ги посетија министерот за здравство Беким Сали и министерката за труд и социјална политика Јована Тренчевска, кои ги даруваа со пригодни подароци и им посакаа најубави желби во понатамошниот живот.
Како што информираше директорката на ГАК Викторија Јовановска, мајката е прворотка, која била со повеќе ризици и затоа препратена од Кочани во Скопје. Д-р Јовановска истакна дека после 12 часот на првиот ден во Новата година се родиле уште три бебиња, вкупно две машки и две женски. Нека се здрави и живи!
