Многу родители несвесно користат фрази кои можат да остават долгорочни последици врз самодовербата и менталното здравје на децата. Психолозите предупредуваат дека одредени коментари, дури и кога не се кажани со лоша намера, можат да го зголемат чувството на вина, анксиозност и несигурност кај децата и тинејџерите.
Особено проблематични се речениците кои создаваат притисок, ги омаловажуваат емоциите или наметнуваат чувство на обврска кон семејството. Советничката Чандра Дејвис предупредува дека некои добро познати фрази често се користат за емоционална манипулација и одржување нездрави односи. Ова се четирите реченици што психолозите и терапевтите ги издвојуваат како потенцијално токсични.
„Толку си убава, момчињата ќе трчаат по тебе“
Иако оваа реченица често звучи како комплимент, психолозите предупредуваат дека детето може да почне да ја поврзува сопствената вредност исклучиво со изгледот и одобрувањето од другите. Ваквите коментари можат да создадат притисок кај децата постојано да изгледаат совршено за да бидат прифатени и сакани.
„Сакаш да вежбаш или да одиш во теретана? Исчисти ја куќата“
Психолозите истакнуваат дека исмејувањето на детските интереси или физичката активност може негативно да влијае врз самодовербата. Кога родителите ги омаловажуваат спортот, танцот или хобијата, децата можат да развијат чувство на срам и несигурност околу активностите што ги исполнуваат и радуваат.
„Премногу си паметен/паметна за да ти треба помош“
Менталното здравје кај децата често се занемарува токму поради ваквите ставови. Психолозите предупредуваат дека интелигенцијата нема врска со анксиозноста, депресијата или АДХД, а одбивањето стручна помош може да доведе до долгорочни емоционални проблеми и чувство дека детето мора само да се справува со сè.
„Крвта не е вода“
Советничката Чандра Дејвис објаснува дека ваквите фрази често се користат за кај децата да се создаде чувство на вина и обврска кон семејството, дури и кога односите се лоши или токсични. Здравите семејни односи треба да се темелат на доверба, почит и емоционална сигурност, а не на притисок и чувство на должност.
