ПИШУВА:
Катерина Шекеровска-Димовска
katerina@pedijatar.mk
Утре и задутре (9 и 10 април) ќе се одржи онлајн Меѓународен симпозиум за тромбоза, во организација на Македонското здружение по кардиологија, на кој ќе се дискутира за тромбозата како пост КОВИД-19 компликација, примената на Европските упатства за пулмонален тромбоемболизам и искуството од реалниот живот со дијагностички и терапевтски модалитети на венска тромбемболија.
Симпозиумот е наменет за кардиолози, специјалисти по васкуларна медицина, интернa медицина, хематологија и трансфузиона медицина, како и субспецијалисти и специјализанти. Неговото одржување е и повод за разговор со професор д-р Маријан Бошевски, кардиолог, Универзитетска клиника за кардиологија и професор по кардиологија и интерна медицина на Медицинскиот факултет во Скопје, воедно и претседател на Симпозиумот и на Работната група за периферна артериска болест и тромбоза на Македонското здружение по кардиологија.
Постојат некои согледувања, но без цврсти докази за појава на тромботични збиднувања после примањето на одредени вакцини. Бројот на тие несакани ефекти е мал во споредба на големата инциденца на новозаболени секојдневно. Имајќи го предвид соодносот на корист наспроти ризикот советот е секако за вакцинација на граѓаните
Професоре, пред нас е Вториот меѓународен симпозиум за тромбоза, кој ќе се одржи утре и задутре (9 и 10 април), во организација на Македонското здружение по кардиологија. Симпозиумот доаѓа во особено чувствително време на пандемија со Ковид-19, каде тромбозата се јавува како една од компликациите на Ковид-19. Oдржувањето на еден ваков стручен настан е од големо значење, па оттука би Ве замолила, како Претседател на Симпозиумот, но и на Работната група за периферна артериска болест и тромбоза, да ни откриете дел од темите кои ќе бидат презентирани на претстојниот настан…
Проф. д-р Бошевски: Благодарам на поканата. Овој меѓународен симпозиум во организација на Македонското здружение по кардиологија станува традиционален.
Би ги истакнал предавањата на професор Мануел Монреал од Риете интернационалниот регистар како пленарно за искуствата од регистрите и реалните искуства за венскиот тромбемболизам и професор Богдан Шупут од Европската академија на науките и уметностите за базичните аспекти на белодробната циркулација.
Десетина странски предавачи од Европа, но и од САД, како и осуммина од земјата ќе предаваат за своите искуства за белодробната емболија, длабоката тромбоза, од акутен или хроничен аспект, интерпретирајќи ги притоа и актуелните светски водичи за дијагноза и лекување на истите.
Секако не помалку важни се презентациите на случаи на лекарите од нашата земја, кои овојпат се пријавија во рекорден број (34).
Најчести знаци и симптоми на тромбоза се оток на ногата, црвенило, послабо движење (кога се работи за длабока венка тромбоза), односно недостиг на воздух, кашлица, сукрвичав исплувок, кога се работи за сомнение за белодробна тромбемболија. Тоа е аларм за пациентот да се јави на лекар
Голем дел од луѓето се исплашени откако повеќе земји ја суспендираа, па повторно продолжија да ја употребуваат вакцината на АстраЗенека, некои и со ограничувања во однос на староста, која се поврзува со повеќе случаи на појава на тромбоза, дел од нив и со фатални исходи. Од друга страна, ЕМА два пати ја потенцира нејзината безбедност и ефикасност, велејќи дека бенефитите ги надминуваат ризиците. Кое е Вашето мислење по ова прашање и што би ги советувале граѓаните кога станува збор за вакцинација против SARS-CoV-2?
Проф. д-р Бошевски: Постојат некои согледувања, но без цврсти докази за појава на тромботични збиднувања после примањето на одредени вакцини. Бројот на тие несакани ефекти е мал во споредба на големата инциденца на новозаболени секојдневно. Имајќи го предвид соодносот на корист наспроти ризикот советот е секако за вакцинација на граѓаните.
Како се манифестира тромбозата? Кои се симптомите кои бараат итна медицинска помош?
Проф. д-р Бошевски: Најчести знаци и симптоми се оток на ногата, црвенило, послабо движење (кога се работи за длабока венка тромбоза), односно недостиг на воздух, кашлица, сукрвичав исплувок, кога се работи за сомнение за белодробна тромбемболија. Тоа е аларм за пациентот да се јави на лекар.
Кои се најчестите кардиоваскуларни последици асоцирани со Ковид-19?
Проф. д-р Бошевски: Широк е спектарот на кардиоваскуларните последици после Ковид-19. Тука се имунотромботичните збиднувања, страдањата на артериските крвни садови (т.н. постковид васкулопатии), но и зафаќањето на сите слоеви на срцето, вклучително и срцевиот мускул. Досега има собрано соодветни искуства, добар дел допрва ќе ги согледуваме. Впрочем и на самиот симпозиум ќе имаме размена на искуства на таа тема.
