ПРОВЕРКА НА НИВОТО НА АНТИТЕЛА КОН SARS-COV-2: Опаѓањето на антителата не ја кажува целата приказна, внимателно со толкување на резултатите, вели стручната фела

Тестовите за антитела не успеваат да измерат една многу важна гранка на имунолошкиот систем: Т-клетките, кои ги чистат инфицираните клетки и спречуваат инфекцијата да стане сериозна, и Б-клетките, кои произведуваат нови антитела, кои дополнително таргетираат одреден сој по изложување на вирусот

Постојат различни типови на тестови за антитела - квалитативни, кои едноставно ќе ви кажат дали имате или немате антитела и квантитативни, кои го одредуваат бројот на антитела што ги имате

Со оглед на се почестите информации дека нивото на антитела може да почне да опаѓа шест месеци по вакцинацијата против коронавирус, луѓето ширум светот се повеќе прават тестови за да го проверат имунитетот против Ковид-19 и на тој начин одлучуваат дали ќе земат трета или бустер доза и дополнително ќе се заштитат од вирусот.

Повеќето експерти се согласуваат дека е прерано да се донесе цврста одлука за вакцинација со трета доза, врз основа на тестирање на антитела. Американската агенција за храна и лекови (ФДА) во мај предупреди дека не треба да се практикуваат тестови за антитела за да се провери имунитетот по вакцинацијата. Појаснето е дека овие податоци се ограничени и дека тестовите за антитела не нудат целосна слика за тоа колку е отпорен нечиј имунолошкиот систем.

Нивото на антителата неизбежно ќе се намалува со текот на времето, но организмот ќе се сеќава на вирусот. Дури и ако тестот за антитела покаже дека имате ниски антитела, на долг рок би можеле да бидете многу добро заштитени од сериозна болест, хоспитализација и смрт благодарение на вашите Т-клетки и Б-клетки

Имајќи го ова на ум, експертите открија некои битни индикации за нивото на антитела и заштитата што ја обезбедуваат од симптоматска инфекција со коронавирус. Сепак, нема доволно податоци за едно лице да се прогласи заштитено ако има одредена количина антитела во организмот.

„Тестовите за антитела се добри, но тие се и ограничени“, вели Адам Ратнер, директор на педијатрискиот оддел за инфективни болести во една болница во Њујорк, пишува „Хафингтон пост“.

Кога се корисни тестовите за антитела?

Постојат различни типови на тестови за антитела – квалитативни, кои едноставно ќе ви кажат дали имате или немате антитела и квантитативни, кои го одредуваат бројот на антитела што ги имате.

Квалитативните тестови – оние што покажуваат плус или минус – се корисни за да се утврди дали веќе сте биле заразени, но не се корисни кога станува збор за проценка на имунитетот создаден од вакцината.

Исто така, постојат и тестови за антитела кои ги мерат антителата против таканаречениот шилест протеин, кој нашиот имунолошки систем би требало да го „нападне“ по вакцинацијата, и други кои мерат антитела против елементот наречен нуклеокапсид, кои се корисни за откривање дали некој имал Ковид-19 претходно, но не успеваат да детектираат антитела кај некој кој е само вакциниран.

Главната дилема со квантитативните тестови за антитела е тоа што не знаеме точно колку антитела се потребни за заштита од Ковид-19.

„Дури и квантитативно да ги проверите антителата и да ми го кажете нивниот број, не знам што да ви кажам – дали е тоа доволно, дали ќе ве заштити или е премалку? Едноставно, се уште ги немаме тие податоци“, објаснува Ониема Огбуагу, специјалист за заразни болести на Јеил.

Во овој момент, експертите во голема мера се согласуваат дека тестовите за антитела би можеле да бидат најкорисни за утврдување на претходна инфекција и одредување дали имунокомпромитирана личност покажала имунолошки одговор на првите две дози на вакцина или по третата доза, вели Моника Ганди, експерт на Универзитетот Калифорнија во Сан Франциско.

Што можат да ни покажат тестовите за антитела?

Тестовите за антитела не успеваат да измерат една многу важна гранка на имунолошкиот систем: Т-клетките, кои ги чистат инфицираните клетки и спречуваат инфекцијата да стане сериозна, и Б-клетките, кои произведуваат нови антитела, кои дополнително таргетираат одреден сој по изложување на вирусот.

  • Затоа, „треба да бидеме многу внимателни во начинот на кој ги толкуваме антителата кои исчезнуваат со текот на времето“, вели Огбуагу

Нивото на антителата неизбежно ќе се намалува со текот на времето, но организмот ќе се сеќава на вирусот. Дури и ако тестот за антитела покаже дека имате ниски антитела, на долг рок би можеле да бидете многу добро заштитени од сериозна болест, хоспитализација и смрт благодарение на вашите Т-клетки и Б-клетки.

Тестовите за антитела, исто така, не ни кажуваат ништо за квалитетот на антителата. Некои наоди покажуваат дека со намалувањето на нивото на антитела, тие постепено се заменуваат со антитела со повисок квалитет, што укажува на тоа дека на крајот се потребни помалку антитела за заштита на телото.

„Опаѓањето на антителата не ја кажува целата приказна“, заклучува Ганди.