Од утре (3 мај) во сите основни училишта ширум државава почнува уписот на првачиња за учебната 2022/2023 година.
Основното образование е задолжително, трае девет години и се организира во три воспитно-образовни периоди и тоа од прво до трето одделение, од четврто до шесто одделение и од седмо до деветто одделение.
Кои дечиња се запишуваат во 2022/2023 учебна година? Уписот е задолжителен за децата кои до крајот на декември 2022 година ќе наполнат шест години, станува збор за деца кои се родени во текот на 2016 година, а право на упис, по претходно барање од родителот или старателот, како и добиено мислење од педагогот или психологот во училиштето, имаат и деца родени во текот на јануари 2017 година.
Меѓу потребните документи за запишување се: потврда за примени задолжителни вакцини, потврда за извршен стоматолошки преглед и потврда за офталмолошки преглед
Пријавата за упис на првачиња родителите ја пополнуваат електронски на веб-страницата на училиштето или во просторииите на училиштето, по што добиваат информација за датум и време за упис на детето. На закажаниот ден родителот ќе може да ги заврши сите активности поврзани со уписот на детето во прво одделение, а притоа треба да ги носи со себе следните документи кои се потребни за запишување:
- Потврда за примени задолжителни вакцини, издадена од надлежна установа;
- Потврда за стоматолошки преглед, издадена од надлежна установа (потврдата може да се добие по извршен преглед во училишната стоматолошка амбуланта);
- Потврда за офталмолошки преглед, издадена од надлежна установа („Мој термин“ оваа година отвори специјални амбуланти за првачиња, но тешко се доаѓа до слободен термин);
- Лична карта од родител – на увид.
Доколку родителот дава информација дека детето е дете со попреченост треба да се достави и проценка од стручната комисија за проценка на деца и младинци за дополнителна образовна, социјална и здравствена поддршка според МКФ.
Запишувањето на детето, на барање на родителот, односно старателот, здравствената установа може да го одложи за една година ако се утврди дека детето не е подготвено да оди на училиште.
