Строгите родители имаат поголеми шанси нивното дете да биде подебело од оние родители кои се цврсти во воспитувањето, но праведни и покажуваат емоции, открива едно канадско истражување.
Родителите кои поставувале строги граници без многу дијалози биле етикетирани како авторитарни и имале најголеми шанси да имаат дебели деца. Ризикот е зголемен за околу една третина од децата.
Најмала шанса за дебелеење имаат децата кои растат во рамнотежа на правила и искажување на љубов
Истражувањето се базира на податоци за 37.577 деца помлади од 11 години, односно на прашалници пополнети од нивните родители за начинот на кој ги воспитуваат. Потоа, научниците ги споредиле класифицираните стилови на родителство со индексите на телесната маса на децата.
Научничката Лиза Какинами од Универзитетот Мекгил во Монтреал рече дека спиралата на дебелина ги погодува повеќето канадски земји и дека треба да се обрне внимание на начинот на кој родителите и децата комуницираат дома. „Родителите барем треба да бидат свесни за својот родителски стил“, посочи таа.
„Најмала шанса за дебелеење имаат децата кои растат во рамнотежа на правила и искажување на љубов“, беше објавено.
Научниците исто така дошле и до заклучок дека сиромаштијата е поврзана со дебелината кај децата, но сепак најмногу влијание имал стилот на родителство.
Децата уште од мали треба да се учат и да се поттикнуваат да јадат здрава храна, но никогаш не треба да се користи т.н. „диктаторски пристап“. „Иако овие наоди изгледаат изненадувачки, лекцијата која ја учиме е да им дозволиме на децата да бидат дел од процесот на одлучување кога станува збор за храната“, додал д-р Дејвид Хаслам, претседател на Националниот форум за дебелина, пишува „Дејли мејл“.
