Повеќето родители на почетокот самите им ги мијат забите на децата, сè додека тие не развијат доволна моторика за самостојно четкање. Сепак, уште од најрана возраст е важно да се покаже правилната техника и процесот да се претвори во пријатна и забавна навика.
Освен што детето учи како правилно да се грижи за забите, ова може да стане и убав момент за поврзување меѓу родителот и детето.
Од моментот кога ќе се појават првите заби, треба да започне и нивната нега. Колку порано детето се запознае со оваа рутина, толку полесно ќе ја прифати како природен дел од денот.
Изберете четка за заби соодветна за детската уста – најдобро со помала глава и подолга рачка, за полесно користење. Важно е и четката да биде визуелно привлечна и забавна, бидејќи тоа дополнително ја зголемува мотивацијата.
За миењето на забите да стане пријатно искуство, може да помогнат песнички, разговор или дури и кратки видеа и цртани филмови на таа тема. На тој начин полесно се постигнува препорачаното време од две минути.
Подеднакво важно е родителите да ја знаат и правилната техника на миење заби, бидејќи децата најмногу учат преку имитација.
Рутината е клучна – миењето заби треба да стане дел од утринските и вечерните навики, без исклучоци. Детето треба да научи дека тоа е задолжителен дел од денот, веднаш по станување и пред спиење.
Кај децата над шест години може да се воведе и употреба на безалкохолни средства за плакнење уста, со цел дополнително отстранување на бактерии, но секогаш по консултација со стоматолог.
Редовните стоматолошки прегледи, најмалку еднаш годишно, се исто така многу важни. Изберете стоматолог со кој детето ќе се чувствува удобно и без страв, бидејќи позитивното искуство значително влијае на односот кон оралното здравје во иднина.
